რევაზ სოხაძე: ინფრასტრუქტურის სამინისტრო ხარისხის კონტროლის თანამედროვე ლაბორატორიას ქმნის
ინფრასტრუქტურის სამინისტროში მიღებულია გადაწყვეტილება, შეიქმნას თანამედროვე, მრავალფუნქციური ლაბორატორია, რომელიც სამშენებლო და ინფრასტრუქტურული პროექტების ხარისხის კონტროლს უზრუნველყოფს. ინიციატივა ეფუძნება იმ საჭიროებას, რომ ქვეყანაში ხარისხის შეფასებისთვის არსებობდეს შესაბამისი ინსტრუმენტული და ტექნოლოგიური შესაძლებლობები - ამის შესახებ ინფრასტრუქტურის მინისტრმა, რევაზ სოხაძემ, ტელეკომპანია რუსთავი 2-ის გადაცემაში „დებატები“ განაცხადა.
მინისტრის თქმით, დღევანდელი მდგომარეობით, როგორც საავტომობილო გზების დეპარტამენტში, ისე მუნიციპალური განვითარების ფონდში, მსგავსი სრულფასოვანი ტექნიკური საშუალებები არ არსებობდა, რაც თანამედროვე, ციფრულ ეპოქაში მნიშვნელოვან გამოწვევას წარმოადგენდა. სამინისტრო უკვე აქტიურად მუშაობს ამ მიმართულებით და უახლოეს პერიოდში საქართველოში ფუნქციონირებას დაიწყებს რეგიონში ერთ-ერთი ყველაზე ძლიერი ლაბორატორია.
ახალი ლაბორატორია უზრუნველყოფს ინფრასტრუქტურული პროექტების ყველა ძირითადი კომპონენტის ხარისხის კონტროლს — მათ შორის საგზაო და სამოქალაქო მშენებლობას, წყალმომარაგებისა და წყალარინების სისტემებს, სამშენებლო მასალებსა და სხვა მნიშვნელოვან ელემენტებს.
რავაზ სოხაძემ ისაუბრა პროექტების შესრულების ხარისხზეც და აღნიშნა, რომ პროექტების ხარისხი არ არის დამოკიდებული მხოლოდ კომპანიის წარმომავლობაზე. ქართული კომპანიებიც ასრულებენ სამუშაოებს მაღალი და სამინისტროს მიზანია, ასეთი კომპანიების რაოდენობა კიდევ უფრო გაიზარდოს. ამასთან, საერთაშორისო კომპანიების ჩართულობა ავტომატურად არ ნიშნავს მაღალი ხარისხის გარანტიას.
მისივე თქმით, სამინისტროს მთავარი პრინციპია, რომ როგორც ადგილობრივმა, ისე საერთაშორისო კომპანიებმა სრულად დაიცვან საქართველოში მოქმედი სტანდარტები და პატივი სცენ ქვეყნის მოთხოვნებს.
„არავის მიეცემა შესაძლებლობა იფიქროს, რომ საქართველოში შესაძლებელია დაბალი ხარისხის სამუშაოების შესრულება და ეს დარჩება რეაგირების გარეშე,“ - აღნიშნა რევაზ სოხაძემ.