რუბიო: აშშ-სა და მის მოკავშირეებს გეგმა „ბე“ უნდა ჰქონდეთ, იმ შემთხვევისთვის, თუ ირანი ჰორმუზის სრუტის ხელახლა გახსნაზე უარს იტყვის
აშშ-ის სახელმწიფო მდივანმა, მარკო რუბიომ პარასკევს განაცხადა, რომ აშშ-სა და მის მოკავშირეებს გეგმა „ბე“ უნდა ჰქონდეთ, იმ შემთხვევისთვის, თუ ირანი ჰორმუზის სრუტის ხელახლა გახსნაზე უარს იტყვის.
„შემიძლია გითხრათ, რისი იმედიც მაქვს - და სწორედ ამაზე გავამახვილე ყურადღება: ყველას ძალიან გაგვიხარდებოდა ირანთან ისეთი შეთანხმების მიღწევა, რომლის ფარგლებშიც სრუტეები გახსნილი იქნებოდა, ისინი კი უარს იტყოდნენ თავიანთ ბირთვულ ამბიციებზე, კერძოდ, ბირთვული იარაღის შექმნის ამბიციებზე“, - განაცხადა რუბიომ შვედეთის ქალაქ ჰელსინგბორგში, სადაც იგი პარასკევს ნატოს საგარეო საქმეთა მინისტრების შეხვედრაზე დასასწრებად ჩავიდა.
„ეს არის ის, რისი იმედიც ყველას გვაქვს და რაზე მუშაობასაც კვლავაც გავაგრძელებთ. ამ მიმართულებით მუშაობა ახლაც კი მიმდინარეობს, როცა მე თქვენ გელაპარაკებით. თუმცა, ჩვენ ასევე უნდა გვქონდეს გეგმა „ბე“. და გეგმა „ბე“ გულისხმობს იმას, თუ რა ხდება მაშინ, თუ ირანი უარს იტყვის სრუტეების გახსნაზე? რა მოხდება, თუ ირანი გადაწყვეტს: „ჩვენ უარს ვამბობთ სრუტეების გახსნაზე, ეს სრუტეები ჩვენი იქნება და ამიერიდან გადასახადებს დავაწესებთ“? კარგი, მაგრამ ამ ეტაპზე ამის წინააღმდეგ რაღაც უნდა გაკეთდეს“, - დასძინა მან.
