რუსეთის შეიარაღებულმა ძალებმა კიევზე მასირებული იერიში მიიტანეს უპილოტო საფრენი აპარატებისა და ბალისტიკური რაკეტების გამოყენებით - დაბომბვის დროს კიევ-პეჩერის ლავრის ტერიტორიაზე ხანძარი გაჩნდა
15 ივნისის ღამეს, რუსეთის შეიარაღებულმა ძალებმა კიევზე მასირებული იერიში მიიტანეს უპილოტო საფრენი აპარატებისა და ბალისტიკური რაკეტების გამოყენებით. დაბომბვის დროს კიევ-პეჩერის ლავრის ტერიტორიაზე ხანძარი გაჩნდა. ამის შესახებ დედაქალაქის მერმა, ვიტალი კლიჩკომ განაცხადა.
„ხანძარი კიევ-პეჩერის ლავრის ტერიტორიაზე. ცეცხლი მიცვალების საკათედრო ტაძრის სახურავზეა“, - დაწერა მან ღამის დაახლოებით ორ საათზე.
მოგვიანებით, კიევის საქალაქო სამხედრო ადმინისტრაციის ხელმძღვანელმა, ტიმურ ტკაჩენკომ დააზუსტა, რომ, წინასწარი ინფორმაციით, ხანძრის მიზეზი პირდაპირი მოხვედრა გახდა.
„დადასტურებულია კიევ-პეჩერის ლავრის ტერიტორიაზე არსებული ნაგებობების აალება. წინასწარი მონაცემებით - პირდაპირი მოხვედრის შედეგად. ამჟამად ვადგენთ რუსების მიერ მიყენებული ზარალის ხარისხს. უსაფრთხოების პროტოკოლების ფარგლებში ხორციელდება ღონისძიებები ხანძრის ლოკალიზაციისთვის“, - განაცხადა ტიმურ ტკაჩენკომ.
მოგვიანებით მან დასძინა, რომ ხანძარი მასშტაბური აღმოჩნდა და მნიშვნელოვანი დაზიანებები გამოიწვია.
იმედი
წყარო: imedinews.ge