რუსეთმა ხერსონში ავტობუსი დაბომბა. დაიღუპა ორი ადამიანი

რუსეთის შეიარაღებულმა ძალებმა უკრაინის ქალაქ ხერსონის დნეპრის რაიონში ავტობუსი დაბომბა, რის შედეგადაც ორი ადამიანი დაიღუპა. ინფორმაციას ხერსონის საოლქო-სამხედრო ადმინისტრაციის ხელმძღვანელი, ალექსანდრე პროკუდინი ავრცელებს.

მისი თქმით, ერთი გარდაცვლილი ქალია, ხოლო მეორე - კომუნალური სამსახურის თანამშრომელი. როგორც პროკუდინმა განაცხადა, ინციდენტის შედეგად დაშავდა შვიდი ადამიანი - ექვსი მამაკაცი და ერთი ქალი. ყველა დაშავებული სამედიცინო დაწესებულებაშია გადაყვანილი.

„წინასწარი ინფორმაციით, მათ ტრავმები აფეთქების ტალღამ მიაყენა. ექიმები დაშავებულებს გამოკვლევებს უტარებენ და ყველა საჭირო დახმარებას უწევენ“, - დასძინა პროკუდინმა.