რუსთავის მე-6 პენიტენციურ დაწესებულებასთან პარტია „დროა“-ს მიერ ორგანიზებულ აქციაზე, მსჯავრდებულ გიორგი დავითაძის ოჯახის წევრებთან ერთად, „ნაციონალური მოძრაობის“, პარტია „ახალი“-ს, „ლელო“-სა და „დროა“-ს წევრები და აქტივისტები იმყოფებოდნენ

რუსთავის მე-6 პენიტენციურ დაწესებულებასთან, პარტია „დროა“-ს მიერ ორგანიზებულ აქციაზე მსჯავრდებულ გიორგი დავითაძის ოჯახის წევრებთან ერთად, „ნაციონალური მოძრაობის“, პარტია „ახალი“-ს, „ლელო“-სა და „დროა“-ს წევრები და აქტივისტები იმყოფებოდნენ. მათ მცირერიცხოვნობა იმით ახსნეს, რომ ადგილი რთულად მისადგომია.

შეკრებილების მტკიცებით ბადრაგებმა დავითაძეზე იძალადეს. პენიტენციური სამსახურის განმარტებით კი „არათუ სექსუალური, არამედ არანაირი სახის ძალადობას არ ჰქონია ადგილი“.

უწყებამ გუშინ გაავრცელა ვიდეო მასალა, რომელიც 2025 წლის 21 დეკემბერს დეესკალაციის საკანში გადაყვანისა და იქ ყოფნის კადრებს ასახავს. მათივე განმარტებით, დავითაძემ კატეგორიულად თქვა უარი შემოწმება-დათვალიერებაზე, რის შემდეგაც დაწესებულების თანამშრომლებმა, მათზე დაკისრებული მოვალეობის შესრულების მიზნით, ელექტროდეტექტორის გამოყენებით, იძულებით ჩაუტარეს შემოწმება მსჯავრდებულს.

გიორგი დავითაძეს 17 წლით თავისუფლების აღკვეთა აქვს მისჯილი. მას პოლიციელის განზრახ მკვლელობის მცდელობას და ცეცხლსასროლი იარაღის უკანონო შეძენა ტარებას ედავებოდნენ, საქმეზე განაჩენი უკვე დამდგარია.