სააკაშვილის ყოფილი პრესმდივანი დარინა ჩიჟი აცხადებს, რომ ანდრეი ერმაკისთვის გირაოს ნაწილის გადახდის გამო სამსახურიდან გაათავისუფლეს

უკრაინელი ჟურნალისტის, დარინა ჩიჟის განცხადებით, ის სამსახურიდან მას შემდეგ გაათავისუფლეს, რაც უკრაინის პრეზიდენტის ოფისის ყოფილი ხელმძღვანელის, ანდრეი ერმაკისთვის გირაოთი განსაზღვრული თანხის ნაწილი გადაიხადა.

ჩიჟი ამის შესახებ სოციალურ ქსელში წერს და აქვეყნებს ფოტოებს უმაღლესი ანტიკორუფციული სასამართლოს ანგარიშზე თანხის გადარიცხვის შესახებ.

„მკაფიოდ ვასხვავებ, სად არის სამართლიანობა და სადაა მისი სახელით შენიღბული ანგარიშსწორება. ამიტომ დღეს შემაქვს გირაო ანდრეი ერმაკისთვის. ეჭვი არ მეპარება, სააკაშვილი თავისუფალი რომ ყოფილიყო, ის ზუსტად ასევე მოიქცეოდა“, - წერს ჩიჟი.

ამის შემდეგ კი, აქვეყნებს პოსტს სადაც წერს: „ერმაკი ჯერ არ გაუთავისუფლებიათ, მე უკვე კი“.

აღსანიშნავია, რომ დარინა ჩიჟი ტელეარხებზე “1+1” და “СТБ”-ზე მუშაობდა და ასევე იყოს საქართველოს ყოფილი პრეზიდენტის, მიხეილ სააკაშვილის პრესმდივანი უკრაინაში.

ცნობისთვის, 14 მაისს უკრაინის უმაღლესმა ანტიკორუფციულმა სასამართლომ ერმაკს კორუფციულ საქმეზე აღმკვეთი ღონისძიების სახით წინასწარი პატიმრობა შეუფარდა. სასამართლომ პატიმრობის ვადა 60 დღით განსაზღვრა. თუმცა, ერმაკს აქვს უფლება 140 მილიონი გრივნის გირაოს გადახდის შემთხვევაში საპატიმრო დატოვოს.