საბერძნეთის თავდაცვის მინისტრი: კიევმა ბოდიში უნდა მოიხადოს საბერძნეთის კუნძულთან მეთევზეების მიერ უკრაინული სამხედრო დრონის აღმოჩენის გამო
კიევმა ბოდიში უნდა მოიხადოს საბერძნეთის კუნძულთან მეთევზეების მიერ უკრაინული სამხედრო დრონის აღმოჩენის გამო, რამაც ათენში უსაფრთხოების კუთხით შეშფოთება გამოიწვია, - განაცხადა საბერძნეთის თავდაცვის მინისტრმა.
„უკრაინას ჩვენ წინაშე ძალიან დიდი ბოდიში მართებს“, - აღნიშნა საბერძნეთის თავდაცვის მინისტრმა, ნიკოს დენდიასმა და დასძინა, რომ კიევმა ასევე უნდა დაარწმუნოს ათენი, რომ მსგავსი რამ აღარ განმეორდება.
უკრაინული საზღვაო დრონი გასულ კვირას მეთევზეებმა იონიის ზღვაში, კუნძულ ლეფკადასთან შეამჩნიეს. გავრცელებული ინფორმაციით, დრონს 100 კილოგრამი ასაფეთქებელი ნივთიერება გადაჰქონდა და რადარებით მისი დაფიქსირება რთული იყო.
ათენმა ეს საკითხი ევროკავშირის სხვა მთავრობებთან გასულ კვირას, ბრიუსელში გამართულ საგარეო საქმეთა მინისტერიალზე წამოჭრა და ამჟამად უკრაინისთვის დემარშს ამზადებს. კიევის პირველი რეაქცია კი იყო ის, რომ ისინი მომხდართან დაკავშირებით გამოძიებას ჩაატარებენ.
იმედი
წყარო: imedinews.ge