საფრანგეთმა ატლანტის ოკეანეში რუსული „ჩრდილოვანი ფლოტის“ ტანკერი დააკავა

საფრანგეთის სამხედრო-საზღვაო ძალებმა ატლანტის ოკეანეში დააკავა ნავთობტანკერი „ტაგორი“, რომელიც საერთაშორისო სანქციების ქვეშ იმყოფება. ინფორმაციას საფრანგეთის პრეზიდენტი ემანუელ მაკრონი ავრცელებს.

მისი თქმით, ტანკერი რუსეთიდან მიდიოდა. ოპერაცია საფრანგეთის პარტნიორებთან, მათ შორის დიდ ბრიტანეთთან ერთად, „საზღვაო სამართლის მკაცრი დაცვით“ განხორციელდა.

„მიუღებელია, რომ გემები გვერდს უვლიდნენ საერთაშორისო სანქციებს, არღვევდნენ საზღვაო სამართალს და აფინანსებდნენ ომს, რომელსაც რუსეთი უკრაინის წინააღმდეგ უკვე 4 წელზე მეტია აწარმოებს. ეს გემები, რომლებიც საზღვაო ნაოსნობის ყველაზე ელემენტარულ წესებსაც კი უგულებელყოფენ, ასევე საფრთხეს უქმნიან გარემოსა და საერთო უსაფრთხოებას“, - განაცხადა მაკრონმა.

„საფრანგეთი რუსული „ჩრდილოვანი ფლოტის“ ტანკერებს პირველად არ აკავებს. მარტში ქვეყნის სამხედრო-საზღვაო ძალებმა დააკავეს ტანკერი „დეინა“, რომელიც მურმანსკიდან მოზამბიკის დროშის ქვეშ მიცურავდა. თუმცა 1 თვის შემდეგ საფრანგეთის ხელისუფლებამ „დეინას“ მარსელის პორტის დატოვების ნება დართო.