შალვა პაპუაშვილი ჩენდლერის ინსტიტუტის ანგარიშზე: ეს პირდაპირ მხილებაა ბრიუსელისა და სხვადასხვა დედაქალაქის დეზინფორმაციის საქართველოს წინააღმდეგ
პარლამენტის თავმჯდომარე შალვა პაპუაშვილი ჩენდლერის ინსტიტუტის ანგარიშს გამოეხმაურა, რომლის მიხედვითაც სამართლისა და პოლიტიკის ძლიერი სიჯანსაღით საქართველოს ხელისუფლება გლობალურად 26-ე პოზიციაზეა, ევროპის საუკეთესო ოცეულშია და მაღალ- საშუალო შემოსავლიან ქვეყნებს შორის პირველ ადგილს იკავებს.
პაპუაშვილის თქმით, ეს შედეგები პირდაპირი მხილებაა ბრიუსელისა და სხვა დედაქალების, რომელთა დეზინფორმაციაც მიმართულია საქართველოს წინააღმდეგ.
„ყოველ ჯერზე ხდება მხილება იმ ელჩებისა და უცხოური ქვეყნების ხელისუფლებების, რომლებიც საქართველოს წინააღმდეგ დეზინფორმაციას აწარმოებენ. ასე რომ ეს პირდაპირ მხილებაა ბრიუსელისა და სხვადასხვა დედაქალაქების დეზინფორმაციისა საქართველოს წინააღმდეგ. როდესაც საქმე მიდგება ობიექტურ, ფაქტებზე დაფუძნებულ შეფასებაზე, ეს უტყუარი ფაქტია, რომ საქართველო არა მხოლოდ კარგ ფორმაშია ამ მხრივ, არამედ უსწრებს ყველა კანდიდატ ქვეყანას უმეტესი კრიტერიუმებით, არაფერი რომ ვთქვათ უკრაინასა და მოლდოვასთან საქართველოს შედარებაზე. ასე რომ ეს არის ფაქტი. რასაც დღეს ჩვენ ბრიუსელი და რამდენიმე ევროპული დედაქალაქი გვასაღებს, ეს არის მათი პოლიტიკური დღის წესრიგის გატარების სურვილი, დეზინფორმაცია, რომელიც პირდაპირ იხარშება ბრიუსელში და შემდეგ, გადმოედინება პროპაგანდისტული ნიაღვრით საქართველოში და არამხოლოდ. საქართველოს დისკრედიტაციისთვის გამოიყენება სხვადასხვა ქვეყანაშიც",- აღნიშნა პაპუაშვილმა.
იმედი
წყარო: imedinews.ge