შალვა პაპუაშვილი: გამოვიდეს ხაზარაძე და თავად ილაპარაკოს თუ რაიმეს თქმა უნდა, თუ რაიმე ეთქმის ანაკლიასთან დაკავშირებით. ეს არის ადამიანი, რომელმაც ფაქტობრივად კრახამდე მიიყვანა ანაკლიის პროექტი

გამოვიდეს ხაზარაძე და თავად ილაპარაკოს თუ რაიმეს თქმა უნდა, თუ რაიმე ეთქმის ანაკლიასთან დაკავშირებით. ეს არის ადამიანი, რომელმაც ფაქტობრივად კრახამდე მიიყვანა ანაკლიის პროექტი, - განაცხადა საქართველოს პარლამენტის თავმჯდომარემ შალვა პაპუაშვილმა სერბეთში ჟურნალისტებთან.

მას კითხვა „ლელო - ძლიერი საქართველოს“ ინიციატივასთან დაკავშირებით დაუსვეს, რომ პორტის განვითარებაში სომხეთი და აზერბაიჯანიც ჩაერთონ, ხოლო სამი ქვეყნის მონაწილეობით ერთობლივი კავკასიური კონსორციუმი შეიქმნას.

„ლელო“ არის თაღლითების მიერ დაფუძნებული პარტია, რომელიც იყო ჩვეულებრივი თაღლითური პროექტი იმისთვის, რომ საქართველოს ბიუჯეტიდან გამოეძალათ მილიარდ ნახევარი. ეს თაღლითობა ჯერ ქართულ სასამართლოებში გამოაშკარავდა და შემდეგ საერთაშორისო არბიტრაჟებში. მათი მოსაზრებები ანაკლიასთან დაკავშირებით არავის აინტერესებს. გასაგებია, რომ ხაზარაძე ავალებს მათ, მაგრამ ცოტა თვითონაც ხომ უნდა დაფიქრდნენ, რომ არ უნდა იყვნენ გამხმოვანებლები ყველაფრის, რასაც ხაზარაძე ეუბნებათ?! გამოვიდეს ხაზარაძე და თავად ილაპარაკოს თუ რაიმეს თქმა უნდა, თუ რაიმე ეთქმის ანაკლიასთან დაკავშირებით. ეს არის ადამიანი, რომელმაც ფაქტობრივად კრახამდე მიიყვანა ანაკლიის პროექტი. სახელმწიფომ მის გამო ოცჯერ შეცვალა ხელშეკრულებები, იმის გამო, რომ შანსი მიეცა და დახმარებოდა იმისთვის, რომ ინვესტიციები მოეზიდა. აღმოჩნდა, რომ საერთო ჯამში, თაღლითობასთან ჰქონდათ საქმე. არანაირი ინვესტორი არ მოუზიდია“ , - აღნიშნა პაპუაშვილმა.