შალვა პაპუაშვილი გერმანიის საგარეო უწყების ვებგვერდზე საქართველოს შესახებ მონაცემების არგანახლებაზე: ეს არის თავდასხმა საქართველოს სუვერენიტეტზე, ამ თავდასხმას სათანადო პასუხი სჭირდება და ამას აკეთებს საგარეო საქმეთა სამინისტრო

ეს არის თავდასხმა საქართველოს სუვერენიტეტზე, ამ თავდასხმას სათანადო პასუხი სჭირდება და ამას აკეთებს კიდეც საქართველოს საგარეო საქმეთა სამინისტრო, - განაცხადა საქართველოს პარლამენტის თავმჯდომარემ შალვა პაპუაშვილმა.

მან ასე უპასუხა ჟურნალისტის კითხვას გერმანიის ელჩის განცხადებასთან დაკავშირებით, რომ გერმანიის საგარეო საქმეთა სამინისტროს ვებგვერდზე საქართველოს პრეზიდენტისა და საგარეო საქმეთა მინისტრის შესახებ ინფორმაციის არგანახლება ტექნიკური ხარვეზით არის გამოწვეული და გადაწყვეტილება გონივრულ დროში იქნება მიღებული.

„ბატონი პეტერის აგდებულ საუბარზე რთულია რაიმე კომენტარის გაკეთება. ერთადერთი სიკეთე, რაც მას კიდევ შეუძლია, გააკეთოს საქართველოსთვის, დატოვოს ეს ქვეყანა, მას გასდის ვადა და მგონი, მთელი ქვეყანა დაისვენებს ამ ქედმაღლური ზიზღისგან, რომელიც პირდაპირ ისმის მისი თითოეული კომენტარიდან. მართლაც განცვიფრებული ვარ, როგორ შეიძლება, ელჩს ჰქონდეს ასეთი დამოკიდებულება მასპინძელი ქვეყნისა და ხალხის მიმართ, ასე პირდაპირ ზიზღს ავლენდეს იმ ქვეყნის ხელისუფლების მიმართ, როგორც ის იქცევა. ასე რომ, ბატონი პეტერის ფაილი ჩვენთვის დახურულია. ველით მის გამგზავრებას უკან, გერმანიაში“, - განაცხადა პარლამენტის თავმჯდომარემ.

როგორც ცნობილია, გერმანიის საგარეო საქმეთა სამინისტროს ოფიციალურ საიტზე საქართველოს პრეზიდენტად კვლავ სალომე ზურაბიშვილი, ხოლო საგარეო საქმეთა მინისტრად კვლავ ილია დარჩიაშვილია მოხსენიებული. ქართული მხარის არაერთი მიმართვის მიუხედავად, საგარეო უწყება მონაცემებს არ ცვლის.

საქართველოს საგარეო საქმეთა სამინისტრომ გერმანიის საგარეო საქმეთა ფედერალურ სამინისტროს მორიგი ნოტა გაუგზავნა.