შალვა პაპუაშვილი: მნიშვნელოვანია, რომ საზოგადოების ყველა ჯგუფი და განსაკუთრებით ახალგაზრდობა იყოს ჩართული სახელმწიფოს აღმშენებლობაში და აღმშენებლობის შესახებ მსჯელობაში

მინდა მადლობა გადავუხადო „ქართული ოცნების“ ახალგაზრდულ ორგანიზაციას, რომელიც ასე ინტენსიურად და, რაც მთავარია ღიად, ყოველგვარი დახურული თემისა თუ საკითხის გარეშე შევიდა ამ დისკუსიაში, დაპატიჟა და მოიწვია ყველა, ვინც მზად იყო საღი დისკუსიის ნაწილი ყოფილიყო, - განაცხადა შალვა პაპუაშვილმა მმართველი პარტიის ახალგაზრდული ორგანიზაციის შემაჯამებელ კონფერენციაზე საუბრისას.

როგორც პარლამენტის თავმჯდომარემ აღნიშნა, ქვეყნის მასშტაბით ამ ღონისძიებების მიმართ დიდი ინტერესი იყო, რაც ახალგაზრდების პოლიტიკურ და საზოგადოებრივ დებატებში ჩართვის კარგი საფუძველია.

„მნიშვნელოვანია, რომ საზოგადოების ყველა ჯგუფი და განსაკუთრებით ახალგაზრდობა იყოს ჩართული სახელმწიფოს აღმშენებლობაში და აღმშენებლობის შესახებ მსჯელობაში. ჩვენი ახალგაზრდობა ძალიან კარგად ხედავს, თუ რა მნიშვნელობა აქვს ქვეყნის მშვიდ და სტაბილურ განვითარებას იმისთვის, რომ როცა მოვა მათი დრო ხელისუფლებაში ყოფნისა, საქართველო იყოს იმ წერტილზე, როდესაც უკვე შეეძლებათ ქვეყნის განვითარებაში ახალი ეტაპის დაწყება და არა ძველი პრობლემების მოგვარებაზე ფიქრი“, - განაცხადა პაპუაშვილმა.