„შემიძლია იმ ხაფანგების ამოცნობა, რომლებსაც რუსეთი, როგორც წესი, მოლაპარაკებების დროს აგებს“ - კაია კალასი აცხადებს, რომ შეუძლია რუსეთთან ევროკავშირის მომლაპარაკებლის როლი შეასრულოს
ევროკავშირის საგარეო პოლიტიკის ხელმძღვანელმა, კაია კალასმა ევროკავშირის საბჭოს სხდომის შემდგომ გამართულ პრესკონფერენციაზე განაცხადა, რომ რუსეთთან მომავალი დიალოგის შემთხვევაში, მას შეუძლია ევროკავშირის მომლაპარაკებლის როლი შეასრულოს.
კითხვაზე იმის შესახებ, იქნებოდა თუ არა მზად გამხდარიყო ევროკავშირის მთავარი მომლაპარაკებელი, კალასმა თავის იურიდიულ განათლებაზე მიუთითა.
მან განაცხადა, რომ შეუძლია იმ ხაფანგების ამოცნობა, რომლებსაც რუსეთი, როგორც წესი, მოლაპარაკებების დროს აგებს.
ევროკავშირის დიპლომატმა აღნიშნა, რომ მან თავისი პროფესიული კარიერის ნახევარი იურისტად და საადვოკატო ფირმის პარტნიორად იმუშავა და მრავალ მოლაპარაკებაში მიიღო მონაწილეობა.
ამავდროულად, კალასმა ხაზგასმით აღნიშნა, რომ ევროკავშირს ჯერ კიდევ სჭირდება რუსეთის მიმართ საერთო მოთხოვნებზე შეთანხმება ნებისმიერი მომავალი სამშვიდობო მოლაპარაკებებისთვის, რადგან მოსკოვი ამჟამად ნამდვილი დიალოგისთვის მზადყოფნის არანაირ ნიშანს არ ავლენს.
მისი ხედვით, ევროკავშირი ჯერ არ არის იმ პოზიციაში, რომ სამშვიდობო მოლაპარაკებებში ჩაერთოს. მან დასძინა, რომ წევრ ქვეყნებს შორის გრძელდება დისკუსიები იმის შესახებ, თუ რა კონკრეტული პირობები უნდა წარედგინოს რუსეთს.
კალასმა ასევე განაცხადა, რომ ევროკავშირი ვერ ხედავს რუსეთის მხრიდან კეთილსინდისიერად მოლაპარაკებებში ჩართვის სურვილს და აღნიშნა, რომ წევრი ქვეყნები ჯერ კიდევ მსჯელობენ იმაზე, თუ რას ითხოვენ ზუსტად მოსკოვისგან.
