სიძულვილის ენის წინააღმდეგ ბრძოლის ფარგლებში სასამართლომ მოქალაქე მამია კვირკველიას საქმე განიხილა

სიძულვილის ენის წინააღმდეგ ბრძოლა გრძელდება. დღეს სასამართლომ მოქალაქე მამია კვირკველიას საქმე განიხილა. მან შეურაცხმყოფელი კომენტარი დაწერა სახელმწიფო მინისტრის მიმართ. პროცესზე კვირკველია არ გამოცხადდა, თუმცა კომენტარის ავთენტიკურობა დაადასტურა და შეურაცხყოფას გამოხატვის თავისუფლებით ამართლებს.

საქმეზე გადაწყვეტილება ხვალ გამოცხადდება.

„თუკი ადგილი აქვს აზრის გამოხატვას და ეს აზრის გამოხატვა ჯდება იმ დასაშვებ ფორმებში, რომ არ გადადის ზღვარგადასულ ლანძღვა-გინებაში, კონკრეტულ ადამიანებზე შეურაცხმყოფელ გადაკიდებაში, ბუნებრივია, ეს არის დაცული გამოხატვის თავისუფლებით.

დაჯარიმდნენ ადამიანები, რომლებმაც მაგალითად კონკრეტული ოპოზიციური პარტიის წარმომადგენლების მიმართ გამოიჩინეს შეურაცხმყოფელი დამოკიდებულება. გამოხატვის თავისუფლებით დაცული არის კონკრეტული პირების უფლება, რომ მათ გამოხატონ საკუთარი პოზიცია, მაგრამ ეს გამოხატვა არ უნდა იჭრებოდეს სხვის ღირსებაში და არ უნდა ლახავდეს სხვა ადამიანის ღირსებას. როგორც კი სხვა ადამიანის ღირსებას ლახავს და ეს არის ლანძღვა-გინება, ეს ყველაფერი არღვევს საზოგადოებრივ წესრიგს, ბუნებრივია ჩვენი ვალდებულებაა, მოვახდინოთ რეაგირება.

ბოლო პერიოდში მნიშვნელოვნად შემცირდა ასეთი ქმედებები. თუკი ადგილი ექნება კონკრეტულ რეაგირებას კონკრეტულ ქმედებებზე, ეს, რა თქმა უნდა, პრევენციისთვის ერთ-ერთი მნიშვნელოვანი საშუალებაა“, - განუცხადა ჟურნალისტებს საქართველოს შინაგან საქმეთა მინისტრის მოადგილე ალექსანდრე დარახველიძემ.