თენგიზ შარმანაშვილი: არასდროს ვყოფილვართ ევროკავშირთან კონფლიქტის გაღრმავების ინიციატორები. ობიექტურ დამოკიდებულებას და თანასწორუფლებიან პარტნიორულ ურთიერთობებს ვითხოვთ

არასდროს ვყოფილვართ ევროკავშირთან კონფლიქტის გაღრმავების ინიციატორები და თუ ისინი შეწყვეტენ ამ ცალმხრივ მიდგომებს, ჩვენი ნაბიჯები არ დააყოვნებს, - განაცხადა საპარლამენტო უმრავლესობის წევრმა, თავდაცვისა და უსაფრთხოების კომიტეტის თავმჯდომარის პირველმა მოადგილემ თენგიზ შარმანაშვილმა.

მისი თქმით, საქართველოს ხელისუფლება ევროკავშირისგან ითხოვს ობიექტურ დამოკიდებულებასა და თანასწორუფლებიან პარტნიორულ ურთიერთობებს.

„4 ოქტომბერს დაანონსებული იყო სახელმწიფო გადატრიალება და ამას მხარი დაუჭირეს. არ ვლაპარაკობ რიტორიკაზე, ვსაუბრობ კონკრეტულ ქმედებებზე. ასეთი ბევრი შემიძლია ჩამოვთვალო. ასე რომ, ჩვენი ნაბიჯები ყოველთვის საპასუხო იყო. არასდროს ვყოფილვართ ევროკავშირთან კონფლიქტის გაღრმავების ინიციატორები და თუ ისინი შეწყვეტენ ამ ცალმხრივ მიდგომებს, ჩვენი ნაბიჯები არ დააყოვნებს. ერთადერთ რამეს - ობიექტურ დამოკიდებულებას ვითხოვთ, ვითხოვთ ფაქტებზე და არა აღქმებზე დაფუძნებულ ურთიერთობებს, არა რევოლუციური სიტუაციების წახალისებას, არამედ თანასწორუფლებიან პარტნიორულ ურთიერთობებს“, - აღნიშნა შარმანაშვილმა.

ევროკავშირის უმაღლესი წარმომადგენელი საგარეო საქმეთა და უსაფრთხოების პოლიტიკის საკითხებში კაია კალასი აცხადებს, რომ ევროკავშირში გაწევრების სურვილის მიუხედავად, საქართველოს ხელისუფლება არასწორი მიმართულებით დგამს ნაბიჯს. მიზეზად დაფინანსების გამოყოფის შეზღუდვას ასახელებს. საუბარია საქართველოს ხელისუფლების მიერ გამჭვირვალობის უზრუნველყოფაზე.