The New York Times: აშშ ირანზე თავადსხმის განახლებისთვის ემზადება

აშშ-მა უახლოეს დღეებში, შესაძლოა, ირანზე სამხედრო იერიშები განაახლოს. ინფორმაციას The New York Times-ი ამერიკელ და ახლო აღმოსავლეთში მოღვაწე ჩინოვნიკებზე დაყრდნობით ავრცელებს.

გამოცემის მტკიცებით, ჩინეთიდან დაბრუნების შემდეგ აშშ-ის პრეზიდენტმა, დონალდ ტრამპმა ირანთან დაკავშირებით რამდენიმე მნიშვნელოვანი გადაწყვეტილება უნდა მიიღოს, რადგან მისმა ახლო გარემოცვამ სამხედრო თავდასხმის განახლების გეგმა უკვე მოამზადა.

როგორც The New York Times-ი წერს, აშშ და სხვა ქვეყნები ცდილობენ მონახონ კომპრომისი, რომელიც ირანს საერთაშორისო ნაოსნობისთვის ჰორმუზის სრუტის გახსნას აიძულებდა.

გამოცემას აშშ-ის თავდაცვის მდივნის, პიტ ჰეგსეტის კონგრესში გამოსვლის ფრაგმენტი მოჰყავს, სადაც მან განაცხადა, რომ ამერიკელ სამხედროებს „საჭიროების შემთხვევაში, ესკალაციის გეგმა მომზადებული აქვთ“.

წყაროების ცნობით, აშშ და ისრაელი ირანზე პოტენციური დარტყმების განახლებისთვის „ინტენსიურად ემზადებიან“.

ვარიანტებს შორის, რომელსაც ვაშინგტონი განიხილავს, ირანის ინფრასტრუქტურულ ობიექტებზე დარტყმების გაძლიერება და სპეციალური დანიშნულების ძალების ჩართულობით მიწისქვეშა ბირთვული ობიექტების წინააღმდეგ ოპერაციის ჩატარებაა.

კერძოდ, ამერიკელმა სამხედროებმა, შესაძლოა, ისპაანის ბირთვული კომპლექსის წინააღმდეგ ოპერაციაში მიიღონ მონაწილეობა. როგორც გამოცემა იუწყება, ისპაანში გამდიდრებული ურანი ინახება.

საბრძოლო მოქმედებების განახლებისთვის მზაობას ირანელი ჩინოვნიკებიც გამოთქვამენ.