The Washington Post: ირანის თავდასხმებისგან ისრაელის თავდაცვის დროს, აშშ-მა THAAD-ის ტიპის რაკეტსაწინააღმდეგო სისტემების საკუთარი არსენალის ნახევარზე მეტი გამოიყენა

ირანის თავდასხმებისგან ისრაელის თავდაცვის დროს, აშშ-მა THAAD-ის ტიპის რაკეტსაწინააღმდეგო სისტემების საკუთარი არსენალის ნახევარზე მეტი გამოიყენა. ამის შესახებ ინფორმაციას გამოცემა The Washington Post-ი ოფიციალურ წყაროებზე დაყრდნობით ავრცელებს.

გამოცემის ცნობით, კონფლიქტის მიმდინარეობისას აშშ-მა ასევე გამოიყენა 100-ზე მეტი SM-3 და SM-6 ტიპის საზენიტო რაკეტა. შედარებისთვის, თავად ისრაელმა ირანული იერიშების მოსაგერიებლად Arrow-ს სისტემის 100-ზე ნაკლები, ხოლო David’s Sling-ის სისტემის დაახლოებით 90 რაკეტა გაისროლა.

სამხედრო მაღალჩინოსნები აღნიშნავენ, რომ ირანთან საომარი მოქმედებების განახლების შემთხვევაში, ვაშინგტონს კიდევ უფრო მეტი რაკეტის გამოყენება მოუწევს, ვინაიდან ისრაელის თავდაცვის ძალებმა საკუთარი საჰაერო თავდაცვის ბატარეების ნაწილი გეგმურ ტექნიკურ მომსახურებაზე გაგზავნა.

„ისრაელს არ შესწევს უნარი, დამოუკიდებლად აწარმოოს და მოიგოს ომები, თუმცა ეს რეალურად არავინ იცის, რადგან საზოგადოება ვერ ხედავს იმას, რაც კულისებს მიღმა ხდება“, - ციტირებს გამოცემა ერთ-ერთი ოფიციალური პირის განცხადებას.

პენტაგონში რესურსების შესაძლო დეფიციტს ან ისრაელთან სამხედრო მარაგების გაზიარების პრობლემას უარყოფენ. უწყების განცხადებით, ბალისტიკური რაკეტების მხოლოდ ერთი კომპონენტია იმ ფართომასშტაბური თავდაცვითი სისტემებისა და შესაძლებლობების ქსელში, რომელსაც აშშ ფლობს.

საკითხს გამოეხმაურა ვაშინგტონში ისრაელის საელჩოც, სადაც ხაზი გაუსვეს ორ ქვეყანას შორის არსებულ სტრატეგიულ პარტნიორობას.

„ამერიკის შეერთებულ შტატებს არ ჰყავს სხვა ისეთი პარტნიორი, რომელსაც ექნება ისეთივე სამხედრო მზადყოფნა, ნება, საერთო ინტერესები და შესაძლებლობები, როგორიც ისრაელს აქვს“, - აღნიშნეს საელჩოში.