თორნიკე ფაღავა: სწორად უწოდებენ სააკაშვილს ალიანსის წევრები „მაოხრებელ გზირს“, რამდენადაც, როგორც ხელისუფლებაში, ასევე ოპოზიციაში, ყოველთვის ცდილობს პოლიტიკური პროცესის კონსტიტუციური ჩარჩოებიდან გატანას, საზოგადოების გახლეჩასა და რევოლუციური პროცესების განხორციელებას

ევროპასთან ინტეგრაციის საპარლამენტო კომიტეტის თავმჯდომარის მოადგილე თორნიკე ფაღავა ოპოზიციაში დაპირისპირებას აფასებს. მისი თქმით, ოპოზიციური ალიანსის წევრები მიხეილ სააკაშვილს „მაოხრებელ გზირს“ სწორად უწოდებენ.

„სწორად უწოდებენ მას [მიხეილ სააკაშვილს] ალიანსის წევრები „მაოხრებელ გზირს“ რამდენადაც, როგორც ხელისუფლებაში, ასევე ოპოზიციაში ყოველთვის ცდილობს პოლიტიკური პროცესის კონსტიტუციური ჩარჩოებიდან გატანას, საზოგადოების გახლეჩას და რევოლუციური პროცესების განხორციელებას. სინამდვილეში არ არსებობს არანაირი ალიანსი. ეს არის სააკაშვილი და „ნაციონალური მოძრაობის“ ირგვლივ გაერთიანებული ერთობა. სააკაშვილმა იქ ვიღაცებს გაახსენა, რათა არ დაავიწყდეთ, რომ ამ ალიანსში ყველაფერი მის ირგვლივ ტრიალებს”, - განაცხადა ფაღავამ.

ოპოზიციურ ალიანსში ისევ დაპირისპირებაა. მიხეილ სააკაშვილი ნიკა მელიას აკრიტიკებს და იმ აქციის დაშლაში ადანაშაულებს, რომელიც სააკაშვილის თქმით, მის გათავისუფლებას ეხებოდა. მელიას თანაგუნდელმა კი „ნაციონალური მოძრაობის“ ლიდერს „მაოხრებელი გზირი“ უწოდა.