ტრამპი: არალეგალი მიგრანტები და უცხოელი თაღლითები ყოველწლიურად მილიარდობით დოლარს ჰპარავენ ამერიკელ გადასახადის გადამხდელს - ჩემი ადმინისტრაციის ისტორიული ძალისხმევის ფარგლებში, მე ახლახან ხელი მოვაწერე ახალ, მძლავრ აღმასრულებელ განკარგულებას
არალეგალი მიგრანტები და უცხოელი თაღლითები ყოველწლიურად მილიარდობით დოლარს ჰპარავენ ამერიკელ გადასახადის გადამხდელს - ჩემი ადმინისტრაციის ისტორიული ძალისხმევის ფარგლებში, მე ახლახან ხელი მოვაწერე ახალ, მძლავრ აღმასრულებელ განკარგულებას, რომლის აღსრულებასაც სათავეში ჩაუდგება ხაზინის დეპარტამენტი, - განაცხადა აშშ-ის პრეზიდენტმა, დონალდ ტრამპმა.
„განკარგულების მიზანია, აღიკვეთოს ბანკების, საკრედიტო ბარათებისა და ფინანსური ინსტიტუტების გამოყენება ადამიანების ტრეფიკინგის, ნარკოტრაფიკის, არალეგალური მიგრაციისა და იმ კრიმინალური კარტელების ხელშესაწყობად, რომლებიც ამ საქმიანობას აორგანიზებენ. ჩვენი ქვეყნის ფინანსურ სისტემებთან წვდომა უნდა შეეზღუდოთ ყველას, გარდა მათთვის, ვისაც აქ ყოფნის კანონიერი უფლება აქვს და ვინც კანონიერ და ლეგიტიმურ კომერციულ საქმიანობას ეწევა. საბანკო ანგარიშები, რომლებიც გამოიყენება არალეგალური მიგრაციის ხელშესაწყობად ან არალეგალი უცხოელების მიერ მიღებული სოციალური დახმარებების შესანახად, დაიხურება, ხოლო სახსრები საბოლოოდ დაექვემდებარება დაყადაღებასა და ჩამორთმევას, რათა ისინი გადასახადის გადამხდელებს დაუბრუნდეთ. ეს არ არის უბრალოდ აბსურდული, ეს უკიდურესად სახიფათოა, რომ ნებისმიერ არალეგალ უცხოელს შეუძლია უბრალოდ წარადგინოს „ლურჯი შტატის“ (შენიშვნა: „დემოკრატების“ მიერ მართული შტატის) მართვის მოწმობა ან ბაიდენის პერიოდის სასაზღვრო დოკუმენტი და მიიღოს შეუზღუდავი წვდომა აშშ-ის ფინანსურ სისტემასთან. ეს ასევე მკაფიო გზავნილია საიმიგრაციო და საბაჟო კონტროლის სამსახურის საწინააღმდეგო აქციების მონაწილეებისთვის, რომ თქვენი ძალადობრივი ქმედებები მხოლოდ აძლიერებს ჩვენს გადაწყვეტილებას. ჩემი აღმასრულებელი განკარგულება ასევე საშუალებას მოგვცემს, შევაჩეროთ ყოველგვარი კრიმინალური საქმიანობის გზით ჩვენი ქვეყნიდან მილიარდობით დოლარის გადინება“, - აღნიშნა ტრამპმა.
