ტრამპი: ირანთან შეთანხმება შეიძლება მომავალ კვირას შედგეს - ირანთან სამშვიდობო შეთანხმება სამხედრო გამარჯვებაზე ბევრად უკეთესიც კი შეიძლება იყოს

აშშ-ის პრეზიდენტმა, დონალდ ტრამპმა ტელეკომპანია ABC News-ს განუცხადა, რომ მისი აზრით, „მომავალი კვირის განმავლობაში“ ირანთან მიაღწევს შეთანხმებას ცეცხლის შეწყვეტის რეჟიმის გახანგრძლივებისა და ჰორმუზის სრუტის ხელახლა გახსნის თაობაზე.

„ყველაფერი კარგად მიდის, კარგად მიდის“, - განაცხადა მან.

„დღეს მცირე შეფერხება იყო, მაგრამ ყველაფერი ძალიან სწრაფად გამოვასწორე, როგორც ალბათ თავადაც შენიშნეთ ცოტა ხნის წინ“, - თქვა ტრამპმა.

პრეზიდენტის თქმით, ეს შეფერხება გამოწვეული იყო იმით, რომ ირანელები უკმაყოფილონი იყვნენ ლიბანზე ისრაელის თავდასხმების გამო.

„ამიტომ, მე ველაპარაკე „ჰეზბოლას“ და ვუთხარი, რომ არ ესროლათ, ასევე ველაპარაკე ბიბის [ისრაელის პრემიერ-მინისტრ ბენიამინ ნეთანიაჰუს] და ვუთხარი - არანაირი სროლა, და მათაც ერთმანეთის მიმართულებით სროლა შეწყვიტეს“, - განაცხადა ტრამპმა.

ტრამპის თქმით, ირანთან სამშვიდობო შეთანხმება „სამხედრო გამარჯვებაზე ბევრად უკეთესიც კი შეიძლება იყოს“.

„ეს არ არის მარტივი საქმე“, - თქვა მან. - „საუბარია მართლაც დიდ ქვეყანაზე, ძალიან დიდ ქვეყანაზე, რომელიც გარიგებაზე მოდის. მართლაც უზარმაზარი მტრობაა“.