ტრამპის თქმით, აშშ ირანის მოსახლეობისთვის იარაღის მიწოდებას ცდილობდა, თუმცა რეგიონულმა მოკავშირემ მათ „იმედები გაუცრუა“
აშშ-ის პრეზიდენტმა დონალდ ტრამპმა Fox News-თან საუბარში განაცხადა, რომ შეერთებული შტატები ირანის მოსახლეობისთვის იარაღის მიწოდებას ცდილობდა, რათა თეირანში მოქმედი რეჟიმის წინააღმდეგ გამოსვლები გაეძლიერებინა, თუმცა, მისი თქმით, რეგიონულმა მოკავშირეებმა მოლოდინი ვერ გაამართლეს.
მისი თქმით, აშშ-მა იარაღი ქურთულ ძალებს გადასცა, რომლებიც ირანის რეგიონულ მოწინააღმდეგეებად მიიჩნევიან, თუმცა, პრეზიდენტის შეფასებით, მათ ეს იარაღი საკუთარი მიზნებისთვის შეინახეს და არ გაავრცელეს.
„ქურთებმა იმედები გაგვიცრუეს, მაგრამ ამას დავიმახსოვრებ“, - განაცხადა ტრამპმა.
მისივე თქმით, თავდაპირველად აღნიშნული გეგმის წინააღმდეგი იყო, რადგან ეჭვობდა, რომ ქურთები „იარაღს დაიტოვებდნენ“.
ტრამპს დამატებითი დეტალები არ დაუზუსტებია იმის შესახებ, თუ როდის განხორციელდა ეს მცდელობა და კონკრეტულად რა სახის იარაღზე იყო საუბარი.
იმედი
წყარო: imedinews.ge