უკრაინელების მიმართ აგრესიის ზრდის ფონზე, ევროკომისია პოლონეთს ევროკავშირის პრინციპებზე მიუთითებს

პოლონეთში მყოფი უკრაინელები აგრესიის ფაქტებზე პოლიციას სულ უფრო ხშირად მიმართავენ, ევროკომისია კი აცხადებს, რომ ევროკავშირის წესების შესრულების მონიტორინგს ახორციელებს. ამის შესახებ ნათქვამია ევროკომისიის ოფიციალურ პასუხში „რადიო თავისუფლების“ შეკითხვაზე.

პოლონეთის პოლიციის მთავარი სამმართველოს მონაცემებით, 2026 წლის პირველ ნახევარში უკრაინის მოქალაქეებმა პოლიციაში 30%-ით მეტი საჩივარი შეიტანეს, ვიდრე გასული წლის იმავე პერიოდში.

ევროკომისიის წარმომადგენლის განცხადებით, კომისია მკაცრად გმობს სიძულვილით მოტივირებული დანაშაულისა და სიძულვილის ენის ყველა გამოვლინებას და განაგრძობს უკრაინელების მხარდაჭერას რუსეთის აგრესიის საპასუხოდ.

ევროკომისიაში ხაზგასმით აღნიშნეს, რომ თანაბარი მოპყრობა, დისკრიმინაციის დაუშვებლობა და სოლიდარობა ევროკავშირის ფუნდამენტური პრინციპებია. სპიკერმა ასევე დასძინა, რომ ევროკომისია სპეციალურ დაფინანსებას გამოყოფს იმ წევრი ქვეყნებისთვის, რომლებიც უკრაინელ ლტოლვილებს მასპინძლობენ.

ევროკომისიის წარმომადგენლის თქმით, უწყება ყურადღებით ადევნებს თვალყურს შესაბამისი ჩარჩო-გადაწყვეტილების აღსრულებას ევროკავშირის ყველა წევრ სახელმწიფოში, მათ შორის პოლონეთშიც.

საუბარია ევროკავშირის ჩარჩო გადაწყვეტილებაზე რასიზმისა და ქსენოფობიის წინააღმდეგ ბრძოლის შესახებ. დოკუმენტი წევრ ქვეყნებს ავალდებულებს, სისხლის სამართლებრივად დასჯადი გახადონ სიძულვილის ენა და ძალადობისკენ საჯარო მოწოდება, მათ შორის ეროვნული ან ეთნიკური კუთვნილების ნიშნით.

გარდა ამისა, ევროკავშირის წევრმა ქვეყნებმა რასისტული თუ ქსენოფობიური მოტივი სხვა დანაშაულების გამოძიებისას დამამძიმებელ გარემოებად უნდა განიხილონ.

ევროკომისიამ ყურადღება გაამახვილა დაზარალებულთა დაცვის წესების განახლებაზეც. სპიკერის თქმით, „დაზარალებულთა უფლებების შესახებ დირექტივის“ შესწორებული რედაქცია აძლიერებს დანაშაულისა და, მათ შორის, სიძულვილით მოტივირებული ქმედებების მსხვერპლთა უფლებებს, მხარდაჭერასა და დაცვას.

მან დასძინა, რომ წევრმა სახელმწიფოებმა ოპერატიულად უნდა ასახონ განახლებული დირექტივის დებულებები ეროვნულ კანონმდებლობაში და უზრუნველყონ მათი ეფექტიანი განხორციელება.

Eurostat-ის განახლებული მონაცემებით, ივნისში პოლონეთში დროებითი დაცვის ქვეშ მყოფი უკრაინელების რაოდენობა 6 335 ადამიანით (0.7%-ით) შემცირდა.

მიუხედავად ამისა, პოლონეთი კვლავ რჩება ევროკავშირის ერთ-ერთ მთავარ სახელმწიფოდ, რომელიც უკრაინელების ყველაზე დიდ ნაკადს იღებს - ივნისის ბოლოს მონაცემებით, ქვეყანაში დროებითი დაცვის სტატუსით უკრაინის 961 170 მოქალაქე სარგებლობდა.