სპორტის მინისტრი „იბერია 1999-სა“ და „ლარნეს“ შორის გამართულ მატჩს დაესწრო

მიხეილ მესხის სახელობის სტადიონზე უეფას „ევროპა ლიგის“ III საკვალიფიკაციო ეტაპის განმეორებითი შეხვედრა „იბერია 1999-მა“ ჩრდილოეთ ირლანდიური „ლარნეს“ წინააღმდეგ გამართა. შეხვედრაში ქართველმა ფეხბურთელებმა ანგარიშით 2:1 გაიმარჯვეს. პირველი მატჩი „იბერია 1999-მა“ „ლარნეს“ წინააღმდეგ სტუმრად ითამაშა, შეხვედრა ფრედ, 0:0 დასრულდა. ინფორმაციას სპორტის სამინისტრო ავრცელებს.

უწყების ცნობით, „იბერია 1999-ის“ მომდევნო მეტოქე „ევროპა ლიგის“ პლეიოფში პოლონურ „იაგელონიასა“ და შოტლანდიურ „რეინჯერსს“ შორის გამარჯვებული იქნება. „ევროპა ლიგის“ პლეიოფში თამაშის გარდა, ქართულმა კლუბმა კონფერენს ლიგის ჯგუფურ ეტაპზე თამაში გაინაღდა.

„მატჩს საქართველოს სპორტის მინისტრი შალვა გოგოლაძე, საქართველოს სახელმწიფო დაცვის სპეციალური სამსახურის უფროს, გენერალ-ლეიტენანტ ანზორ ჩუბინიძესთან, საქართველოს ოლიმპიური რეზერვების მზადების ეროვნული ცენტრის დირექტორ მუხრან შამათავასთან და საფეხბურთო კლუბ „იბერია 1999-ის“ პრეზიდენტ ტარიელ ხეჩიკაშვილთან ერთად დაესწრო.

განმეორებით შეხვედრაში ანგარიში 74-ე წუთზე ვახო ბედოშვილის გოლით გაიხსნა, საპასუხო გოლი კი ჩრდილოეთ ირლანდიელმა ჯეიმს სიმპსონმა 76-ე წუთზე გაიტანა და ანგარიში გაათანაბრა. მატჩის ძირითადი დრო ფრედ, 1:1 დასრულდა. დამატებით დროში კი 102-ე წუთზე ნიკა სიხარულიშვილის გოლით „იბერია 1999-მა“ ერთბურთიანი უპირატესობა მოიპოვა. საბოლოოდ, თამაში ქართველი ფეხბურთელების სასარგებლოდ 2:1 დასრულდა“, - აღნიშნულია გავრცელებულ ინფორმაციაში.