უკრაინის თავდაცვის სამინისტრო: საბრძოლო ვითარების შესახებ დამახინჯებულ ანგარიშებს თანამდებობის პირებისთვის პირდაპირი უარყოფითი შედეგები მოჰყვება

საბრძოლო ვითარების შესახებ დამახინჯებულ ანგარიშებს თანამდებობის პირებისთვის პირდაპირი უარყოფითი შედეგები მოჰყვება. ამის შესახებ უკრაინის თავდაცვის სამინისტროს პრესსამსახურმა განაცხადა.

„30-ე, 128-ე და 108-ე ბრიგადების დაშორებულ პოზიციებზე საკვებით არასათანადო მომარაგების შემთხვევები სისტემური არ უნდა გახდეს. თავდაცვის სამინისტრო ამ საკითხზე გენერალურ შტაბთან ერთად მუშაობს. საჩვენებელია 14-ე ბრიგადაში შექმნილი სიტუაცია: სახმელეთო ჯარების კომისია აწარმოებს გამოძიებას, ბრიგადის მეთაური გადაყენებულია, ხოლო დამნაშავეები პასუხს აგებენ“, - ნათქვამია განცხადებაში.

თავდაცვის სამინისტრომ შეახსენა ყველას, რომ მთავარსარდალმა, გენერალმა სირსკიმ დაჯგუფებებისა და კორპუსების სარდლებს 20 მაისამდე ფრონტის ხაზზე მყოფი მებრძოლების მომარაგების შემოწმება დაავალა.

„საბრძოლო ვითარების შესახებ დამახინჯებულ ანგარიშებს თანამდებობის პირებისთვის პირდაპირი უარყოფითი შედეგები მოჰყვება“, - ხაზგასმით აღნიშნეს სამინისტროში.

მანამდე სოციალურ ქსელებში გავრცელდა ინფორმაცია იმის შესახებ, რომ უკრაინის შეიარაღებული ძალების მე-14 ცალკეულ მექანიზებულ ბრიგადაში, ცალკეულ პოზიციებზე, სურსათით მომარაგების მხრივ შეფერხებები იყო.

სკანდალის ფონზე, უკრაინის შეიარაღებული ძალების გენერალურმა შტაბმა მე-14 ცალკეული მექანიზებული ბრიგადის მეთაური თანამდებობიდან გადააყენა. ასევე, თანამდებობიდან გაათავისუფლეს მე-10 არმიის კორპუსის მეთაური.