უნგრეთის ინიციატივით ევროპული საბჭოს დეკლარაციიდან ევროკავშირში უკრაინის სწრაფი გაწევრიანების შესახებ ჩანაწერი ამოიღეს

უნგრეთის პრემიერ-მინისტრმა პეტერ მადიარმა სოციალურ ქსელ X-ში დაწერა, რომ მისი ინიციატივით ევროპული საბჭოს სამიტის პირველი დღის შემდეგ მიღებული დოკუმენტიდან ევროკავშირში უკრაინის სწრაფი გაწევრიანების შესახებ ჩანაწერი ამოიღეს.

„სახელმწიფოთა და მთავრობათა მეთაურების სამიტის შემაჯამებელ დოკუმენტში უკრაინასთან დაკავშირებით მხოლოდ ის ტექსტი შევიდა, რომელიც წლების წინ კონსენსუსის საფუძველზე იყო მიღებული. რამდენიმე კვირის განმავლობაში მიმდინარე სამუშაო პროცესში დეკლარაცია მნიშვნელოვნად გადაიხედა და დაიხვეწა უნგრული წინადადებების გათვალისწინებით. გარდა ამისა, ჩემი ინიციატივით, ბოლო მომენტში ტექსტიდან ამოიღეს ჩანაწერი, რომელიც უკრაინის ევროკავშირში გაწევრიანების პროცესის დაჩქარებას ეხებოდა. ეს მარტივი არ ყოფილა“, - დაწერა მადიარმა.

უნგრეთის პრემიერმა აგრეთვე დასძინა, რომ წელიწად-ნახევრის შემდეგ პირველად გახდა შესაძლებელი ისეთი შემაჯამებელი დეკლარაციის მიღება, რომელსაც ევროკავშირის ყველა წევრი სახელმწიფო ეთანხმება.

„სწორედ ასე მიიღწევა შედეგი, როდესაც ვინმე შეხვედრაზე მხოლოდ დაპირისპირებისა და შიშის დათესვისთვის კი არ მიდის, არამედ კომპრომისის პოვნას ცდილობს“, - აღნიშნა მან.

4 órás intenzív vita után tudtuk lezárni az Európai Tanács ülésének első napirendi pontját. Az állam- és kormányfői csúcs záródokumentumába Ukrajna kapcsán csak már évekkel ezelőtt konszenzussal elfogadott szöveg került. A több hetes szövegezés alatt magyar javaslatra sokat… — Magyar Péter (Ne féljetek) (@magyarpeterMP) June 18, 2026