ვახტანგ ლომჯარია: მნიშვნელოვანია, რომ დამატებით შეფასდეს ხანგრძლივი ეკონომიკური ზრდით გამოწვეული შედეგები, რომ პირველ რიგში შევაფასოთ, თუ რა შეიძლებოდა გაკეთებულიყო მეტი და რაც სწორად გაკეთდა, ამას კიდევ ერთხელ გაესვას ხაზი

თბილისის მერიის ეკონომიკური განვითარების საქალაქო სამსახურის უფროსმა ვახტანგ ლომჯარიამ „დღის ქრონიკაში“ ისაუბრა მდგრადი განვითარების მეთექვსმეტე რეგიონულ ფორუმთან დაკავშირებით, თუ რა დატვირთვა აქვს ამ პლატფორმის მასპინძლობას თბილისისთვის და როგორია მისი თემატიკა.

ლომჯარიას თქმით, ფორუმში მონაწილეობას მიიღებს 1000-მდე სტუმარი 20-მდე ქვეყნიდან.

„20-მდე ქვეყნიდან გვეყოლებიან საერთაშორისო სტუმრები, ექსპერტები, მაღალი დონის სპეციალისტები, რომლებიც პანელურ დისკუსიებზე გაშლიან ძალიან საინტერესო აზრებს, მსჯელობებს. ჩვენთვის ძალიან მნიშვნელოვანია, რომ წლევანდელი თემაა სოციალურ-ეკონომიკური მდგომარეობა. ბოლო წლების განმავლობაში ხანგრძლივი ეკონომიკური ზრდით გამოწვეული შედეგების ანალიზი არის ძლიან მნიშვნელოვანი. უამრავმა ადამიანმა დააღწია თავი სიღარიბეს. 2021 წლიდან 60 ათასზე მეტი ახალი, დამატებითი სამუშაო ადგილი შეიქმნა მხოლოდ თბილისში და მნიშვნელოვანია, რომ დამატებით შეფასდეს ეს ყველაფერი დეტალებში იმისთვის, რომ პირველ რიგში შევაფასოთ, თუ რა შეიძლებოდა, რომ მეტი გაკეთებულიყო და რაც სწორად გაკეთდა ამას კიდევ ერთხელ გაესვას ხაზი და გაგრძელდეს ეს პოლიტიკა“,- განაცხადა ლომჯარიამ.

მანვე აღნიშნა, რომ ფორუმის შარშანდელი თემა იყო მშვიდობის როლი მდგრად განვითარებაში და გამომდინარე იქიდან, რომ ეს საკითხი კიდევ აქტუალურია წელსაც, რამდენიმე პანელი მიეძღვნება ამ თემას.