WP: ამერიკელი სამხედროების დაღუპვის შემდეგ აშშ ირანის წინააღმდეგ უფრო მასშტაბური ოპერაციის ჩატარების შესაძლებლობას განიხილავს
ამერიკის შეერთებული შტატები ირანის წინააღმდეგ საბრძოლო მოქმედებების გაფართოების შესაძლებლობას განიხილავს, - განუცხადეს წყაროებმა The Washington Post-ს. მათივე ინფორმაციით, მასშტაბური ოპერაციის გეგმები მას შემდეგ განიხილება, რაც გასული კვირის განმავლობაში ირანის დარტყმების შედეგად ოთხი ამერიკელი სამხედრო დაიღუპა.
„პენტაგონი უფრო მასშტაბურ ომს გეგმავს“, - განაცხადა გამოცემის ერთ-ერთმა წყარომ.
ამავდროულად, The Washington Post-ის თანამოსაუბრის თქმით, ახლო აღმოსავლეთში მყოფ ამერიკელ სამხედროებს საჰაერო თავდაცვის სისტემების რაკეტებისა და შორი მანძილის საბრძოლო მასალის მარაგები ეწურებათ, რესურსების გადასროლა კი სამხედრო ინფრასტრუქტურისთვის მიყენებული ზიანის გამო გართულებულია. მისივე განცხადებით, სახმელეთო ოპერაციის შემთხვევაში, აშშ ასევე არ არის მზად ირანული დარტყმების ეფექტურად მოსაგერიებლად.
„ჩვენ არ გვაქვს საკმარისი საშუალებები ოპერაციების უსაფრთხო მხარდაჭერისთვის და არ ვფიქრობ, რომ თეთრმა სახლმა ამის შესახებ იცის“, - თქვა მან.
ამ ეტაპზე კი აშშ ირანს ზედიზედ მეცხრე დღეა არტტამს. აშშ-ის შეიარაღებული ძალების ცენტრალური სარდლობის განცხადებაში ნათქვამია, რომ სამიზნეებს წარმოადგენდა „სამეთაურო ცენტრები, საჰაერო თავდაცვისა და სანაპირო მეთვალყურეობის ობიექტები, საზღვაო ობიექტები, რაკეტებისა და უპილოტო საფრენი აპარატების გაშვების ადგილები, ასევე საკომუნიკაციო ქსელები“. დარტყმების მიზანია კიდევ უფრო შემცირდეს ირანის შესაძლებლობა, თავს დაესხას კომერციულ გემებს ჰორმუზის სრუტეში, - განაცხადეს „ცენტკომში“.
თავის მხრივ, ირანის ხელისუფლებამ განაცხადა ქუვეითში მდებარე ამერიკულ ბაზებზე დარტყმების შესახებ, რომელთა მსვლელობისას, როგორც „ისლამური რევოლუციის გუშაგთა კორპუსმა“ (IRGC) გამოაცხადა, დაზიანდა საბრძოლო მასალის საწყობები, ასევე რადარები, მათ შორის Patriot-ის საზენიტო-სარაკეტო კომპლექსებისთვის განკუთვნილი.
17 ივლისს, იორდანიის ავიაბაზაზე ირანის მიერ განხორციელებული დარტყმის შედეგად ორი ამერიკელი სამხედრო მოსამსახურე დაიღუპა. ამერიკული სარდლობის განცხადებით, იქვე იპოვეს კიდევ ერთი დაღუპულის ცხედარი, რომლის ვინაობაც ჯერჯერობით დადგენილი არ არის. როგორც The Washington Post-ი წერს, სავარაუდოდ, საუბარია კიდევ ერთ ამერიკელ სამხედროზე. გარდა ამისა, CENTCOM-მა განაცხადა, რომ კიდევ ერთი სამხედრო მოსამსახურე 18 ივლისს ერაყში დაიღუპა.
