ზვიად გაბისონია: უმაღლესი განათლების რეფორმა არის გეგმის მიხედვით, თვიდან-თვემდე გაწერილია ყველა ის საკითხი, რაც მოცემულ მომენტში უნდა განხორციელდეს და სამინისტრო სკრუპულოზურად მიჰყვება ამ გეგმას
საკითხი არის ზედმეტად პოლიტიზებული, მისაღები გამოცდების წინასწარი მზადების პერიოდი მიმდინარეობს გეგმურად, არანაირი შეფერხებები, დამატებები არ არსებობს, - განაცხადა გადაცემაში „დღის ქრონიკა“ განათლების, მეცნიერებისა და ახალგაზრდობის მინისტრის მოადგილემ ზვიად გაბისონიამ.
მისივე თქმით, უმაღლესი განათლების რეფორმა არის გეგმის მიხედვით, თვიდან-თვემდე გაწერილია ყველა ის საკითხი, რაც მოცემულ მომენტში უნდა განხორციელდეს და სამინისტრო სკრუპულოზურად მიჰყვება ამ გეგმას.
„ყველაფერი მიდის გეგმის მიხედვით. NAEC-ის ხელმძღვანელობა ინტენსიურად ხვდება აბიტურიენტებს, ჩვენც ინტენსიურად ვცდილობთ, რომ შევხვდეთ მათ. მინისტრი ახლაც მაღალმთიან რეგიონებში ხვდება აბიტურიენტების მშობლებს. ამ მიმართულებით არანაირი შეფერხება არც ერთი კატეგორიზაციის დროს ამ პერიოდში არ ყოფილა, ეს არის მთლიანად პოლიტიზებული საკითხი.
მოგეხსენებათ, რომ ცდილობენ უმაღლესი განათლების დემონიზებას და სწორედ ამ კრიტერიუმების გათვალისწინებით არის ხოლმე გარკვეული ტიპის პოლიტიკური განცხადებები, რომელსაც სიმართლესთან არანაირი კავშირი არ აქვს.
ფაკულტეტები გადანაწილებულია, პროგრამები გადანაწილებულია, პროგრამების განსაზღვრა მთავრობის დადგენილებით დაახლოებით სამი თვის წინ უკვე განხორციელდა. სამინისტრომ დააზუსტა პროგრამები, რომელიც შეიძლება განხორციელდეს. ყველაფერი მიდის გეგმის მიხედვით, არასერიოზულია, როდესაც საქართველოს მთავრობას აბრალებენ, თითქოს რაღაცას ქაოსით ახორციელებს“, - აღნიშნა ზვიად გაბისონიამ.
იმედი
წყარო: imedinews.ge