ზვიად შალამბერიძე: ჩვენი საზოგადოება ნამდვილად იმსახურებს პოლიტიკურ ველს, რომელშიც ადგილი არ ექნება სიძულვილის ენას და ეს ნაბიჯი, რომელიც გადადგა ჩვენმა მთავრობამ, არის მიმართული ამ ველის გაჯანსაღებისკენ

ჩვენი საზოგადოება ნამდვილად იმსახურებს პოლიტიკურ ველს, რომელშიც ადგილი არ ექნება სიძულვილის ენას და ეს ნაბიჯი, რომელიც გადადგა ჩვენმა მთავრობამ, არის მიმართული ამ ველის გაჯანსაღებისკენ, - განაცხადა რეგიონული პოლიტიკისა და თვითმმართველობის საპარლამენტო კომიტეტის თავმჯდომარის პირველმა მოადგილემ ზვიად შალამბერიძემ.

მისივე თქმით, მომავალში საზოგადოება ნახავს, რომ კომუნიკაცია ოპოზიციას და პოზიციას შორის იქნება არგუმენტებსა და ფაქტებზე დაყრდნობილი.

„ბოლო წლების განმავლობაში ჩვენ ვიხილეთ თუ როგორ დაამკვიდრა და როგორ ამკვიდრებდა „ნაციონალური“ მოძრაობა და მისი განაყოფები სიძულვილის ენას სხვადასხვა მედიასაშუალებების და სოციალური ქსელის მეშვეობით“, - აღნიშნა ზვიად შალამბერიძემ.

მმართველ გუნდში მიაჩნიათ, რომ ახალი სამმართველო იქნება პირველი რეალური ქმედითი ნაბიჯი იმისთვის, რომ სიძულვილის ენა აღმოიფხვრას. საჯარო სივრცეში, ადამიანის ღირსების შემლახავი/შეურაცხმყოფელი და სიძულვილის ენის შემცველი განცხადებების მონიტორინგი დაიწყო. ამოქმედდა სიძულვილის ენის წინააღმდეგ ბრძოლის სამმართველო, რომელიც მოახდენს სავარაუდო სამართალდამრღვევის გამოვლენას, ვინაობის დადგენას, ადმინისტრაციული წარმოების მასალების მომზადებას, ოქმის შედგენას და საერთო სასამართლოებში გადაგზავნას.