ზვიად შალამბერიძე: საკადრო ცვლილებებს მოჰყვა რაღაც ქილიკი, რომელიც ნამდვილად არ არის სერიოზულად აღსაქმელი, იმიტომ რომ ძალიან მნიშვნელოვანი ცვლილებები მოხდა ჩვენს მთავრობაში
რეგიონული პოლიტიკისა და თვითმმართველობის საპარლამენტო კომიტეტის თავმჯდომარის პირველმა მოადგილემ მთავრობაში საკადრო ცვლილებებზე „დღის ქრონიკაში“ ისაუბრა. ზვიად შალამბერიძემ აღნიშნა, რომ ხელისუფლება და მთავრობა ცოცხალი ორგანიზმია, რომელმაც მყისიერად უნდა უპასუხოს გამოწვევებს და ამ მხრივ დროული რეაგირების მნიშვნელობას გაუსვა ხაზი.
„ჩვენი ხელისუფლებისა და პრემიერ-მინისტრის მხრიდან სწორედ ეს ნაბიჯი გადაიდგა, რის გამოც მივიღეთ ახალი პოზიცია სახელმწიფო მინისტრის სახით, რომელიც კოორდინაციას გაუწევს ძალოვან სტრუქტურებს, ძალოვან სტრუქტურებში კი, შესაბამისად გადანაცვლებები და პოზიციებზე ახალი პირების დანიშვნა განხორციელდა, რასაც თითოეულ მათგანს ვულოცავ და წარმატებას ვუსურვებ. ამას მოჰყვა რაღაც ქილიკი, რომელიც ნამდვილად არ არის სერიოზულად აღსაქმელი, იმიტომ რომ ძალიან მნიშვნელოვანი ცვლილებები მოხდა ჩვენს მთავრობაში, ძალიან მნიშვნელოვანი სტრუქტურული ერთეულებია როგორც შინაგან საქმეთა სამინისტრო, ასევე სახელმწიფო უსაფრთხოების სამსახური და ის აპარატიც, რომელიც შეიქმნა. ისინი ჩვენი ქვეყნის უსაფრთხოების დაცვის ავანგარდში დგანან“, - განაცხადა შალამბერიძემ.
დეპუტატმა ასევე მთავრობაში ახალ პოზიციასთან დაკავშირებით ოპოზიციის რეაქციაზე ისაუბრა.
„რეალურად, ოპოზიციის მხრიდან ეს უადგილო ქილიკი და თითქოს დაკნინება იმ ადამიანების, რომლებსაც შეიძლება ითქვას რომ ჩვენი ქვეყნის რეალური მმართველობის სადავეები უპყრიათ, არის ძალიან უადგილო. რა თქმა უნდა, ოპონირება უნდა გაუწიონ ხელისუფლებას სხვადასხვა მიმართულებით, მაგრამ ეს არ უნდა იყოს უსაგნო ოპონირება და არ უნდა დაკარგონ ის სახე, რომელიც ჯერ კიდევ შენარჩუნებული აქვთ“, - აღნიშნა შალამბერიძემ.
