10 თვეში, საარსებო შემწეობა 191 736 პირს შეუწყდა

მიმდინარე წლის ათ თვეში [იანვარ-ოქტომბერი] საარსებო შემწეობა 191 736 პირს შეუწყდა, აქედან 122 ათასამდე "საზოგადოებრივ სამუშაოზე" დასაქმების პროგრამაში იყო ჩართული, რომელიც მთავრობამ გააუქმა.

სოციალური მომსახურების სააგენტოს მიერ გამოქვეყნებული სტატისტიკიდან ირკვევა, რომ სექტემბერთან შედარებით, ოქტომბერში, შემწეობის მიმღებთა რიცხვი 28 625-ით შემცირდა, აქედან 16 494 სწორედ დასაქმების პროგრამის ბენეფიციარები იყვნენ; 12 ათასზე მეტი პირი კი, სოცდაუცველების ბაზაში ირიცხებოდა.

რაც შეეხება სოციალური შემწეობის მიმღებთა სტატისტიკას, გასულ თვეში სახელმწიფოსგან დახმარება, ჯამში, 518 490 პირმა მიიღო. აქედან 125 159 დასაქმების სახელმწიფო პროგრამის მოსარგებლეა, რომელიც მიმდინარე წლიდან გაუქმდა, თუმცა სისტემაში კვლავ რჩებიან ის ბენეფიციარები, რომელთაც ოთხწლიანი პერიოდი ჯერ კიდევ არ ამოეწურათ.

ცნობისთვის: 7 ოქტომბერს, მთავრობის სხდომის დასრულების შემდეგ, ჯანდაცვის მინისტრმა მიხეილ სარჯველაძემ განაცხადა, რომ საარსებო შემწეობის ბაზების გადახედვის შედეგად სახელმწიფომ რამდენიმე ათეული მილიონი ლარი დაზოგა.

"ვინაიდან ბაზა დინამიკურია და მუდმივად იცვლება სხვადასხვა ფაქტორის გათვალისწინებით მას ემატებიან ახალი ოჯახები ან ტოვებენ. ზუსტი ციფრების დასახელება ამ ეტაპზე შეუძლებელია. თუმცა დანამდვილებით შემიძლია გითხრათ, რომ ბაზის სრულყოფილად გასწორების შემდეგ საუბარია რამდენიმე ათეული მილიონი ლარის დაზოგვაზე", - თქვა სარჯველაძემ.

ქვეყანაში საარსებო შემწეობის მიმღებთა ზრდა 2020 წლიდან დაიწყო, როცა პანდემიის საბაბით სოციალურად დაუცველი მოსახლეობის გადამოწმება შეჩერდა. ამას 2022 წლიდან სახელმწიფო დასაქმების პროგრამაც დაემატა, რომელსაც შემწეობაზე მყოფი პირები დასაქმების ბაზრისთვის უნდა მოემზადებინა, თუმცა პრემიერი კობახიძე ამბობს, რომ წინამორბედის დროს ამუშავებული პროგრამა უსარგებლო, ხოლო დასაქმება ფიქციური იყო. ამასობაში მთავრობის მიერ უსარგებლოდ შეფასებულ პროგრამაზე ბიუჯეტიდან 300 მილიონ ლარზე მეტი დაიხარჯა.