აშშ უკრაინისთვის უკვე შეძენილი Patriot-ის რაკეტების მიწოდებას აფერხებს

ამერიკის შეერთებული შტატები უკვე დაფინანსებული Patriot-ის საზენიტო რაკეტების გადაცემას აფერხებს.

Bloomberg-თან ინტერვიუში უკრაინის პრეზიდენტმა, ვოლოდიმირ ზელენსკიმ განაცხადა, რომ ვაშინგტონმა პარტნიორების მიერ შესყიდული შეიარაღების მხოლოდ ნაწილის მიწოდება დაამტკიცა. მისი თქმით, ეს პროცესი ტექნიკურ შეფერხებას არ უკავშირდება.

უკრაინის პრეზიდენტმა აღნიშნა, რომ აშშ ქვეყანას ამჟამად თვეში მხოლოდ 12 რაკეტას აწვდის, რაც ჯო ბაიდენის ადმინისტრაციის პერიოდთან შედარებით დაახლოებით 4-ჯერ ნაკლებია.

აღსანიშნავია, რომ ამჟამად კიევში საჰაერო თავდაცვის საშუალებების კრიტიკული დეფიციტია შექმნილი. The Washington Post-ის ცნობით, მარაგები მინიმალურ ნიშნულამდე შემცირდა. როგორც მედია წერს, ქვეყანას Patriot-ის ხელმისაწვდომი რაკეტები ფაქტობრივად ამოწურული აქვს.