„ბევრმა ახალგაზრდამ მომწერა“ - კალაძის თქმით, ხმაურის შეზღუდვის წესებზე შსს და ავტო-მოტო ფედერაციები იმუშავებენ

თბილისის მერის, კახა კალაძის განცხადებით, ხმაურის შემცირების მიზნით დაგეგმილ რეგულაციებთან დაკავშირებით აუცილებელია ოპტიმალური ბალანსის დაცვა, რათა უზრუნველყოფილი იყოს მოსახლეობის სიმშვიდე და ამავდროულად, არ დაზიანდნენ ავტო და მოტომოყვარულები.

მედიასთან საუბრისას კალაძემ აღნიშნა, რომ განსაკუთრებით ღამის საათებში კონკრეტულ ქუჩებსა და გამზირებზე ხმაური მოსახლეობისთვის სერიოზულ პრობლემას წარმოადგენს. ამასთან, მან დასძინა, რომ საკითხზე გადაწყვეტილების მიღებისას გათვალისწინებული იქნება ავტო და მოტომოყვარულთა ინტერესებიც, რომელთაგანაც პირადად მიიღო არაერთი შეტყობინება.

„ერთი პრობლემა რაც არის, ეს არის ხმაურისგან შეწუხებული მოსახლეობა, განსაკუთრებით ღამის საათებში, კონკრეტულ ქუჩებზე, კონკრეტულ გამზირებზე, რაც უდიდეს პრობლემას წარმოადგენს მოსახლეობისთვის, თუმცა არის მეორე მხარე ავტო და მოტომოყვარულები. დღეს პრემიერ-მინისტრმაც ისაუბრა ამ საკითხზე. სხვათა შორის, მეც ძალიან ბევრმა ახალგაზრდამ, მოტომოყვარულმა და ავტომოყვარულმა მომწერა აღნიშნულ საკითხთან დაკავშირებით, თუ შეიძლებოდა რაიმე ოპტიმალური გადაწყვეტილების მიღება“, - განაცხადა კახა კალაძემ.

თბილისის მერის თქმით, საკითხზე უკვე შექმნილია სამუშაო ჯგუფები, სადაც შინაგან საქმეთა სამინისტროსთან ერთად ჩართულნი არიან დარგობრივი ფედერაციებიც.

„როგორც პრემიერმა ისაუბრა დღეს, შექმნილია შესაბამისი სამუშაო ჯგუფები, როგორც ავტო-მოტო ფედერაციები კონკრეტული ადამიანების ჩართულობით, ისე შინაგან საქმეთა სამინისტროს თანამონაწილეობით. დარწმუნებული ვარ, ისეთი გადაწყვეტილება მიიღება, რომელიც ოპტიმალური იქნება ყველასთვის, როგორც ავტო და მოტომოყვარულთათვის, ასევე, ისე რომ არ შევაწუხოთ და დავაზიანოთ მოსახლეობა“, - აღნიშნა კალაძემ.

შეგახსენებთ, რომ 2026 წლის 1 იანვრიდან ქვეყანაში ავტომობილების ხმაურზე ახალი რეგულაციები ამოქმედდა. მთავრობის დადგენილებით, დასახლებულ პუნქტებში ღამის საათებში (23:00-დან 08:00-მდე) ხმაურის მაქსიმალური ზღვარი 80 დეციბალით განისაზღვრა. რაც შეეხება დღის საათებსა და მაგისტრალებს, აქ ნორმები ტექინსპექტირების რეგლამენტით დადგენილ სტანდარტებს უნდა შეესაბამებოდეს. კანონის აღსრულებაზე შინაგან საქმეთა სამინისტროა პასუხისმგებელი, რომელიც მძღოლებს სპეციალური პორტატული აპარატებით ამოწმებს. წესები არ ვრცელდება მხოლოდ სპეციალური სტატუსის მქონე სპორტულ ავტომობილებზე, როცა ისინი წინასწარ შეთანხმებულ ლოკაციებზე გადაადგილდებიან.