დევნილთა სააგენტო 500-ზე მეტ ოჯახს საცხოვრებელ სახლებს შეუსყიდის - სამინისტრო
დევნილთა, ეკომიგრანტთა და საარსებო წყაროებით უზრუნველყოფის სააგენტო იძულებით გადაადგილებულ 500-ზე მეტ ოჯახს, მთელი ქვეყნის მასშტაბით, საცხოვრებელ სახლებს შეუსყიდის.
სააგენტოს ინფორმაციით, იმ ოჯახების სია, რომელთა განსახლების თაობაზე დევნილთა საკითხების შემსწავლელმა კომისიამ დადებითი გადაწყვეტილება მიიღო, უწყების ვებგვერდზე უკვე გამოქვეყნდა.
არსებული წესის მიხედვით, იძულებით გადაადგილებულ ოჯახებს ექვსთვიანი ვადა ეძლევათ, რათა საცხოვრებელი სახლები საქართველოს ნებისმიერ რეგიონში თავადვე შეარჩიონ და სააგენტოს წარუდგინონ შესასყიდად.
დევნილი ოჯახების განსახლების მიზნით, სპეციალური საცხოვრებელი კომპლექსების მშენებლობის პარალელურად, კერძო სახლების შესყიდვის პროგრამამ („სოფლად სახლის“ პროექტი) ბოლო პერიოდში განსაკუთრებული მასშტაბები შეიძინა. სააგენტოს მონაცემებით, მიმდინარე წელს უწყებამ საცხოვრებელი სახლი უკვე 1 050 დევნილ ოჯახს შეუსყიდა.
სააგენტოში აცხადებენ, რომ იძულებით გადაადგილებული ოჯახების საცხოვრებლით უზრუნველყოფის პროცესი მომავალში კიდევ უფრო აქტიური რეჟიმით გაგრძელდება.
BM.GE
წყარო: bm.ge