ევროკავშირმა და უკრაინამ დრონების წარმოების შესახებ შეთანხმება გააფორმეს

ევროკომისიის პრეზიდენტმა ურსულა ფონ დერ ლაიენმა და უკრაინის პრეზიდენტმა ვოლოდიმირ ზელენსკიმ დღეს კიევში დრონების წარმოების გაზრდის მიზნით შეთანხმება გააფორმეს.

უკრაინის პრეზიდენტის თქმით, ქვეყანა ამჟამად წელიწადში 10 მილიონ უპილოტო საფრენ აპარატს აწარმოებს და ეს მაჩვენებელი კი, მათ შორის, გაფორებული შეთანხმების დამსახურებით, უახლოეს მომავალში 20 მილიონამდე გაიზრდება. როგორც ზელენსკიმ აღნიშნა, ახალი დრონები ევროკავშირის ტექნოლოგიური ცოდნისა და უკრაინის საბრძოლო გამოცდილების გაერთიანებით შეიქმნება.

მნიშვნელოვანია ითქვას, რომ ამ პროექტის დაფინანსება ევროკავშირის ორი ფინანსური წყაროდან მოხდება. ერთი მხრივ, იმ €90 მილიარდის სესხიდან, რომელიც უკრაინისთვის ევროპულმა ქვეყნებმა უკვე გამოყვეს, მეორე მხრივ, კი იმ €10 მილიარდიდან, რომელიც SAFE-ის თავდაცვის პროგრამის ფარგლებში ჯერ კიდევ აუთვისებელია.

საყურადღებოა, რომ ახალი შეთანხმების ფარგლებში უპილოტო საფრენი აპარატები უკრაინიდან შორს, ამ დროისთვის უცნობ რამდენიმე ევროპულ ქვეყანაში დამზადდება და შეინახება. კიევს კი საჭიროებისამებრ გადაეცემა. როგორც ურსულა ფონ დერ ლაიენმა აღნიშნა, ეს ხელს შეუწყობს საბრძოლო ინვენტარის დაცვას რუსული საფრთხისაგან. საჭიროების შემთხვევაში, დრონები შესაძლოა ევროკავშირის აღმოსავლეთ ფლანგის ქვეყნებსაც კი გადაეცეთ.

ევროკავშირის ახალი ხელშეკრულება პარტნიორობის შესაძლებლობას ორგანიზაციის ოცდაშვიდივე წევრ სახელმწიფოს სთავაზობს. შედარებისთვის, აქამდე უკრაინასთან ორმხრივ შეთანხმებებს ტექნოლოგიური თანამშრომლობის მიზნით მხოლოდ ცალკეული ქვეყნები აფორმებდნენ.

სამომავლოდ ევროკომისია უკრაინასთან თანამშრომლობის კიდევ უფრო გაფართოებას გეგმავს. დაანონსებული გეგმა ბალისტიკური და ანტიბალისტიკური სარაკეტო სისტემების ერთობლივ წარმოებას ითვალისწინებს.