გამოგონილი ონლაინ-კაზინო და ყალბი IT კონტრაქტი: პროკურატურამ თაღლითობის ბრალდებით სამი პირი პასუხისგებაში მისცა

თბილისის პროკურატურამ ჯგუფურად ჩადენილი დიდი ოდენობით თაღლითობის ფაქტზე სამ პირს ბრალი წარუდგინა. საქმე უცხო ქვეყნის მოქალაქისა და სომხეთში მოქმედი კომპანიისგან ასობით ათასი დოლარისა და ევროს თაღლითურად დაუფლებას ეხება.

პროკურატურის გავრცელებული ინფორმაციით, შინაგან საქმეთა სამინისტროს მიერ ჩატარებული გამოძიებით დგინდება, რომ ბრალდებულები ორ დამოუკიდებელ დანაშაულებრივ ეპიზოდში ფიგურირებენ:

• ონლაინ-კაზინოს სქემა (150 000 აშშ დოლარი): ბრალდებულებმა უცხო ქვეყნის მოქალაქეს მოატყუეს, თითქოს 2 000 000 დოლარის ღირებულების ინოვაციური ონლაინ-კაზინოს პროგრამა შექმნეს. ერთ-ერთმა მათგანმა დაზარალებულს მობილურ ტელეფონში ე.წ. პროგრამული კოდიც აჩვენა და 150 000 დოლარის ინვესტიციის სანაცვლოდ, ყოველთვიურად წმინდა მოგების 15-20%-ს დაჰპირდა. დაზარალებულმა 2024 წლის 3 ივნისს აღნიშნული თანხის ეკვივალენტი აქტივი მათ კრიპტო-საფულეზე გადაურიცხა. • სომხური კომპანიის სქემა (40 000 ევრო): ერთ-ერთი ბრალდებული თბილისში სომხეთის რესპუბლიკაში მოქმედი კომპანიის დირექტორის მოადგილეს შეხვდა და თავი მაღალი დონის IT სპეციალისტად გაასაღა. იგი კომპანიას 40 000 ევროდ სარეკლამო ვებგვერდის დამზადებას დაჰპირდა. კვალის არევის მიზნით, სქემაში ჩართეს მეორე პირი, რომელმაც კომპანიასთან ფიქტიური ხელშეკრულება გააფორმა და თანხა საკუთარ საბანკო ანგარიშზე ჩაარიცხვინა.

ჩარიცხვისთანავე ბრალდებულები თანხებს მართლსაწინააღმდეგოდ დაეუფლნენ.

სამართალდამცველებმა ორი პირი სასამართლოს განჩინების საფუძველზე დააკავეს, ხოლო ერთს ბრალი დაუსწრებლად წარედგინა. გამოძიება სისხლის სამართლის კოდექსის 180-ე მუხლით მიმდინარეობს, რაც ჯგუფურად, დიდი ოდენობით ჩადენილ თაღლითობას გულისხმობს და სასჯელის სახედ 6-დან 9 წლამდე ვადით თავისუფლების აღკვეთას ითვალისწინებს.

პროკურატურა ბრალდებულებისთვის აღკვეთის ღონისძიების სახით პატიმრობის შეფარდების შუამდგომლობით სასამართლოს კანონით დადგენილ ვადაში მიმართავს.