ირანზე მასშტაბურ იერიშს მივიტანთ და ხარგის კუნძულს ავიღებთ - ტრამპი

აშშ-ის პრეზიდენტმა დონალდ ტრამპმა ირანის წინააღმდეგ მკაცრი სამხედრო ზომების მიღება დააანონსა, რაც ახლო აღმოსავლეთში დაპირისპირების ახალ ტალღას უკავშირდება.

თეთრი სახლის ლიდერის განცხადებით, ამერიკული ძალები ირანის თავდაცვით ინფრასტრუქტურას უახლოეს პერიოდში უმძიმეს დარტყმას მიაყენებენ. როგორც ირკვევა, ვაშინგტონი გეგმავს სრული კონტროლი დაამყაროს კუნძულ ხარგზე მდებარე ნავთობტერმინალსა და ქვეყნის ენერგეტიკულ ბაზარზე, რომელიც ვენესუელაში განხორციელებული სტრატეგიის ანალოგიური იქნება. ტრამპის შეფასებით, სამხრეთ ამერიკულ სახელმწიფოში ამ მოდელმა სრულიად გაამართლა და ახლა ის ირანშიც დაინერგება. ცნობისთვის, ხარგის კუნძული ირანისთვის სტრატეგიული მნიშვნელობის აქტივია და იქ ეროვნული ნავთობის უდიდესი ნაწილი იწარმოება.

აღსანიშნავია, რომ ამერიკული მხარის მიერ დაგეგმილი ოპერაცია ირანის სამხედრო-საზღვაო, საჰაერო და ანტისარაკეტო პოტენციალის სრულ განადგურებას ისახავს მიზნად. პენტაგონში მიიჩნევენ, რომ ისლამური რესპუბლიკის თავდასხმითი შესაძლებლობების უდიდესი ნაწილი უკვე პარალიზებულია, რაც აშშ-ის ცენტრალური სარდლობის მიერ მანამდე განხორციელებული ოპერაციების შედეგია.

ექსპერტთა ნაწილის ვარაუდით, ენერგეტიკულ ინფრასტრუქტურაზე კონტროლის დაწესება რეგიონში ნავთობის ექსპორტის ნაკადებს მნიშვნელოვნად შეცვლის და მოლაპარაკების პროცესს თავდაყირა დააყენებს.