იტალიის თავდაცვის მინისტრმა უკრაინის თავდაცვის ექსმინისტრ ფედოროვს მრჩევლის პოსტი შესთავაზა

იტალიის თავდაცვის მინისტრმა, გვიდო კროზეტომ უკრაინის ყოფილ თავდაცვის მინისტრ მიხაილო ფედოროვს რომში თავის მრჩევლად მუშაობა შესთავაზა. როგორც ირკვევა, იტალიელმა პოლიტიკოსმა უკრაინელ კოლეგას თანამდებობიდან გადაყენების მეორე დღესვე დაურეკა. კროზეტოს განცხადებით, ფედოროვმა ეს შეთავაზება პატივისცემისა და მეგობრობის ჟესტად მიიღო. თუმცა, დათანხმდა თუ არა ის დასახელებულ წინადადებას, ჯერჯერობით უცნობია.

გამოქვეყნებულ განცხადებაში იტალიის თავდაცვის უწყების ხელმძღვანელმა უკრაინელი პოლიტიკოსის საქმიანობა დადებითად შეაფასა. კროზეტოს თქმით, ფედოროვმა ბრძოლის ველზე თამაშის წესები სრულად შეცვალა, რამაც უკრაინას პოზიციების შენარჩუნებასა და ინიციატივის ხელში აღებაში შეუწყო ხელი. ამასთან, იტალიელმა მინისტრმა ყურადღება გაამახვილა იმ წინააღმდეგობაზე, რომელსაც ფედოროვი მაღალი რანგის გენერლების მხრიდან აწყდებოდა. კროზეტოს შეფასებით, ცვლილებებისადმი მსგავსი წინააღმდეგობა იტალიის, საფრანგეთისა და გერმანიის თავდაცვის სექტორებისთვისაც დამახასიათებელია.

ცნობისთვის, უკრაინის პრეზიდენტმა, ვოლოდიმირ ზელენსკიმ მიხაილო ფედოროვი თავდაცვის მინისტრის თანამდებობიდან მიმდინარე თვის შუა რიცხვებში გადააყენა. მნიშვნელოვანია ითქვას, რომ ფედოროვის სახელს უკრაინულ არმიაში ტექნოლოგიური რეფორმების გატარება უკავშირდება.