ივნისში საქართველოში მშენებლობა 3.9%-ით გაძვირდა - ბოლო ოთხ წელში ჯამური ღირებულება 29.3%-ით გაიზარდა

საქართველოში მშენებლობის ღირებულება იზრდება. საქსტატის მშენებლობის ღირებულების ინდექსის მონაცემებით, 2026 წლის ივნისში, წინა წლის ანალოგიურ პერიოდთან შედარებით, მშენებლობის ჯამური ღირებულება 3.9%-ით გაიზარდა.

წლიურ ჭრილში მშენებლობის გაძვირების მთავარი მიზეზი ტრანსპორტირების, საწვავის და ელექტროენერგიის გაძვირება გახდა, სადაც ინდექსმა ყველაზე მაღალი ზრდა დაფიქსირა.

ხარჯების კატეგორიების მიხედვით, 2025 წლის ივნისთან შედარებით ფასები ასე შეიცვალა:

• ტრანსპორტირება, საწვავი და ელექტროენერგია: გაძვირდა 16.6%-ით; • მანქანა-დანადგარები: გაძვირდა 5.8%-ით; • სხვა ხარჯები: გაიზარდა 5.8%-ით; • ხელფასები: გაიზარდა 1.8%-ით; • სამშენებლო მასალები: გაძვირდა 0.6%-ით.

სექტორულ ჭრილში წლიური გაძვირება ყველაზე მეტად სამოქალაქო მშენებლობებს შეეხო:

• სამოქალაქო სეგმენტი: +5.8% • საცხოვრებელი სეგმენტი: +3.5% • არასაცხოვრებელი სეგმენტი: -0.1%

რაც შეეხება თვიურ დინამიკას, 2026 წლის ივნისში, წინა თვესთან (მაისთან) შედარებით, მშენებლობის ღირებულება 0.9%-ით გაიზარდა.

თვიურ ჭრილში გაძვირების ძირითადი მიზეზი მშენებლობაში დასაქმებულთა ხელფასების ზრდა გახდა, რამაც ერთ თვეში 5.4% შეადგინა.

2022 წლის თებერვლის საბაზო პერიოდთან შედარებით კი 2026 წლის ივნისისთვის მშენებლობის ინდექსი 129.3-ს შეადგენს, რაც იმას ნიშნავს, რომ ბოლო 4 წელიწადში საქართველოში მშენებლობის ჯამური ღირებულება 29.3%-ით არის გაზრდილი.