კრემლმა დონალდ ტრამპის „ენერგეტიკული ზავის“ ინიციატივა მოიწონა
რუსეთის ხელისუფლებამ ენერგეტიკულ ინფრასტრუქტურაზე თავდასხმების შეწყვეტის შესახებ აშშ-ის პრეზიდენტ დონალდ ტრამპის წინადადება დადებითად შეაფასა. კრემლის პრესსპიკერმა დმიტრი პესკოვმა ამ ინიციატივას „ენერგეტიკული ზავი“ უწოდა და ის საერთო ჯამში ძალიან კარგ იდეად შეაფასა. თუმცა საყურადღებოა, რომ ოფიციალურ მოსკოვს აღნიშნულ შეთავაზებაზე საბოლოო თანხმობა ჯერ არ განუცხადებია.
კრემლი მსგავსი შეთანხმების დადების სანაცვლოდ მკაფიო მოთხოვნებს აყენებს. დმიტრი პესკოვის განმარტებით, რუსულ ნავთობგადასამუშავებელ ქარხნებზე უკრაინული თავდასხმების შეწყვეტის პარალელურად, საერთაშორისო ბაზარზე რუსული ნედლეულის შეუფერხებელი ექსპორტიც უნდა დაუშვან. პრესსპიკერმა ნავთობტანკერების ჩათვლით უსაფრთხო კომერციული ნაოსნობის გარანტირების აუცილებლობაზე გაამახვილა ყურადღება. მისი თქმით, ოფიციალური მოსკოვი ამ საკითხს ვაშინგტონთან დეტალურად გაივლის.
ცნობისთვის, აშშ-ის პრეზიდენტმა დონალდ ტრამპმა მანამდე განაცხადა, რომ მოსკოვი და კიევი ენერგეტიკულ ინფრასტრუქტურაზე დარტყმებისგან თავის შეკავებაზე შეთანხმდნენ. თუმცა, ამ განცხადების მიუხედავად, ადგილზე საბრძოლო მოქმედებები კვლავ გაგრძელდა.
BM.GE
წყარო: bm.ge