ომის ფონზე რუსეთში ატმის ექსპორტი გართულდა… რეალიზაცია განსაკუთრებით ჭირს მოსკოვში - ასოციაცია
საქართველოში წელს ატმის მოსავლიანობა შემცირდა. უხვი ნალექის და ძლიერი სეტყვის შედეგად ფერმერების უმრავლესობას ბაღების დიდი ნაწილი დაუზიანდა, რამაც როგორც მოსავლის რაოდენობაზე, ისე მის ხარისხობრივ მაჩვენებლებზე იქონია გავლენა. დაბალი ხარისხობრივი პარამეტრების გათვალისწინებით გართულებულია ექსპორტიც.
სპეციალისტები განმარტავენ, რომ წლევანდელი კლიმატური პირობები - გვიანი გაზაფხული, ხშირი წვიმები და სეტყვა - გადამწყვეტი აღმოჩნდა მოსავლის ხარისხისთვის. დაზიანებულმა ნაყოფმა ვერ დააკმაყოფილა საექსპორტო სტანდარტები, რამაც ფერმერებს რეალიზაციის პრობლემა შეუქმნა. იქიდან გამომდინარე, რომ ატმის ძირითადი გასაღების ბაზარი რუსეთია, ომის ფონზე რუსეთში შექმნილი კრიზისული ვითარების და მსყიდვეუნარიანობის შემცირების გათვალისწინებით, “ხილისა და ბოსტნეულის ექსპორტიორთა ასოციაციის“ თავმჯდომარის თქმით, მოთხოვნა ქართულ ატამზე შემცირდა. ვახტანგ ბეჟიტაშვილის განცხადებით, გაჩნდა ლოგისტიკური სირთულეებიც, გაძვირდა ტრანსპორტირება და საწვავი, რაც ოკუპანტ ქვეყანაში ექსპორტს აფერხებს.
“წლევანდელი კლიმატური პირობები საკმაოდ რთული იყო, გაზაფხული გვიან შემოვიდა, ამას დაემატა საკმაოდ წვიმიანი ამინდები, სეტყვაც იყო საკმაოდ დიდი მოცულობით, რამაც დიდი ზიანი მიაყენა ფერმერებს. ეს არის ერთ-ერთი მთავარი ფაქტორი, რომ მოსავლის ხარისხი და რაოდენობა არ არის ისეთი, როგორიც უნდა იყოს საექსპორტო მოცულობებისთვის.
ძალიან კარგი იქნებოდა, რომ ყოფილიყო ბაზრების დივერსიფიკაცია, რადგანაც რუსეთის მიმართულებით გაგზავნა ამ ეტაპზე უკვე საკმაოდ დიდ სირთულეებთან არის დაკავშირებული იმ კუთხით, რომ რეალიზაცია უკვე ჭირს მთელი რიგი მიმართულებებით, განსაკუთრებით ეს იგრძნობა მოსკოვში, სადაც ძირითადი გასაღების ადგილი იყო. ამჟამად [ქართული ატამი] იყიდება მხოლოდ და მხოლოდ ჩრდილოეთ კავკასიის სხვადასხვა ქალაქებში და უფრო ახლო ადგილებში, რომელიც უფრო ადვილად მისადგომია და ლოჯისტიკურადაც შედარებით იაფია. შესაბამისად, რუსულ ბაზარზეც არ არის კარგი სიტუაცია და ექსპორტიორებს საკმაოდ რთული პერიოდი დაუდგათ ამ კუთხით.