რიკოთის ქარის ელექტროსადგურის პროექტისთვის "წითელ ნუსხაში" შეტანილ 2 370 წაბლის ხეს მოჭრიან

მთავრობის გადაწყვეტილებით, "რიკოთის ქარის ელექტროსადგურის“ მშენებლობის პროექტის ფარგლებში ხაშურის, სურამისა და ცედანის ტყეებში, „წითელ ნუსხაში“ შეტანილ 2 370 ინდივიდ წაბლს ამოიღებენ.

კერძოდ, მთავრობის მიერ გამოქვეყნებულ განკარგულებაში წერია, რომ ხაშურის მუნიციპალიტეტის ტერიტორიაზე, „რიკოთის ქარის ელექტროსადგურის“ მშენებლობის პროექტის ფარგლებში, 110 კვ სიმძლავრის ელექტროგადამცემი ხაზის სამშენებლო და საექსპლუატაციო სამუშაოების განხორციელების მიზნით, შპს ტაბას ეძლევა უფლება, ეროვნული სატყეო სააგენტოს მართვას დაქვემდებარებულ სახელმწიფო ტყეში, ბუნებრივი გარემოდან ამოიღოს საქართველოს „წითელ ნუსხაში“ შეტანილი მცენარის შემდეგი სახეობა:

• „ჩვეულებრივი წაბლი“ (Castanea sativa Mill.) – 370 ერთეული; • 8 სმ-ზე ნაკლები ტაქსაციური დიამეტრის მქონე „ჩვეულებრივი წაბლი“ (Castanea sativa Mill.) – 2000 ერთეული;

კომპანია ვალდებულია გარემოსდაცვითი ზედამხედველობის დეპარტამენტს წინასწარ აცნობოს „წითელ ნუსხაში“ შეტანილი მცენარეთა ამოღების დაგეგმილი ვადების შესახებ.

"მოჭრილი მერქნული რესურსი, დაუკოტრავი სახით, დაასაწყობოს ეროვნული სატყეო სააგენტოს მიერ მითითებულ ტერიტორიაზე და გადასცეს მიღება-ჩაბარების აქტით, კანონმდებლობის შესაბამისად", - წერია დოკუმენტში.

ცნობისთვის, "რიკოთის ქარის ელექტროსადგურს" თურქული "ანადოლუ ჰოლდინგი" აშენებს. კომპანიის მიერ წარდგენილი განცხადების თანახმად, თუკი წარსულში რიკოთის ტერიტორიაზე 24-მეგავატიანი ელექტროსადგურის მშენებლობა იგეგმებოდა, ამჟამად პროექტის დადგმული სიმძლავრე 25 მეგავატამდე არის გაზრდილი. პროექტის ფარგლებში სულ ოთხი ქარის ტურბინა განთავსდება.

წარდგენილი დოკუმენტაციის თანახმად, ქარის ელექტროსადგურები კომპანია Goldwind (GWH171) მოდელის ქარის ტურბინა გენერატორებით აღიჭურვება, თითოეულის დადგმული სიმძლავრე 6.25 მეგავატ საათს შეადგენს.