საფრანგეთმა კვანტური ტექნოლოგიებისთვის 1.5 მილიარდი ევრო გამოყო

Reuters-ის ცნობით, საფრანგეთის პრეზიდენტმა ემანუელ მაკრონმა ქვეყნის კვანტური სტრატეგიისთვის დამატებით €1 მილიარდი ($1.16 მლრდ.) გამოყო, მიკროელექტრონიკის მხარდაჭერის პროგრამისთვის კი ბიუჯეტი €550 მილიონით გაზარდა. არსებული ინფორმაციით, ეს გადაწყვეტილება გლობალურ ძალებს შორის თანამედროვე ტექნოლოგიების სფეროში ლიდერობისთვის ბრძოლის გამწვავებას უკავშირდება. გასათვალისწინებელი ფაქტია, რომ ამ მოვლენამდე ზუსტად ერთი დღით ადრე აშშ-ის ადმინისტრაციამ კვანტური გამოთვლების სფეროში მომუშავე ცხრა კომპანიაში $2 მილიარდის ინვესტირების გეგმა წარადგინა.

რაც შეეხება მაკრონის გადაწყვეტილების დეტალებს, ახალი სახელმწიფო პროგრამის ფარგლებში ფინანსური მხარდაჭერის უდიდესი ნაწილი მოიპოვა ფრანგულმა კომპანია Alice & Bob-მა, რომელიც სპეციალურ კვანტურ ბიტებზე მუშაობს. ის მიღებულ ახალ კაპიტალს შეცდომებისადმი მდგრადი აპარატურის განვითარებას მოახმარს. აღსანიშნავია, რომ ფრანგული კომპანია Nvidia-ს ფონდის ბენეფიციარიცაა და გასულ წელს €100-მილიონიანი დაფინანსებასაც მიიღო. დასახელებული კომპანია აწარმოებს უნიკალურ კომპონენტებს, რომლებსაც კვანტური გამოთვლებისას ნაკლები ხარვეზები ახასიათებს.

Alice & Bob-ი აქტიურად მონაწილეობს საფრანგეთის ეროვნულ პროგრამა PROQCIMA-ში, რომლის განვითარებასაც ქვეყნის შეიარაღებული ძალების სამინისტრო ხელმძღვანელობს. ეს ინიციატივა 2032 წლისთვის ორი ფრანგული უნივერსალური კვანტური კომპიუტერის პროტოტიპის ინდუსტრიალიზაციისთვის მომზადებას ითვალისწინებს.

ცნობისთვის, კვანტური გამოთვლები თანამედროვე ტექნოლოგიების ერთ-ერთ წამყვან მიმართულებად მიიჩნევა. მას მედიკამენტების აღმოჩენის, ფინანსური მოდელირებისა და კრიპტოგრაფიის პროცესების მნიშვნელოვნად დაჩქარება შეუძლია.