საქართველოს ეროვნულ ბანკს სომხეთის ცენტრალური ბანკის დელეგაცია ეწვია

საქართველოს ეროვნულ ბანკს სომხეთის ცენტრალური ბანკის დელეგაცია ეწვია. სებ-ის მიერ გავრცელებული ინფორმაციის თანახმად, ვიზიტის მიზანი იყო საქართველოს მიერ განხორციელებული საგადახდო ინფრასტრუქტურის მოდერნიზაციის პროექტის გამოცდილების გაზიარება და თანამედროვე საგადახდო სისტემების განვითარების მიმართულებების განხილვა.

ორდღიანი სამუშაო შეხვედრების ფარგლებში ეროვნული ბანკის წარმომადგენლებმა სომეხ კოლეგებს წარუდგინეს ბანკთაშორისი, დროის რეალურ რეჟიმში ანგარიშსწორების (RTGS) და კლირინგის (ACH) სისტემების განახლების პროექტის დანერგვის გამოცდილება. თავის მხრივ სებ-მა ამ სისტემის განახლება 2026 წლის მაისში დაასრულა.

შეხვედრებზე განხილული იყო პროექტის დაგეგმვისა და მართვის პროცესი, სისტემის არქიტექტურა, ოპერაციული და ფუნქციური მოდელი, მონაწილე ბანკებთან და ფინანსთა სამინისტროს სახაზინო სამსახურთან კოორდინაცია, ასევე ტესტირების ეტაპები და სისტემის რეალურ გარემოში გაშვების პროცესი.

მხარეებმა ასევე იმსჯელეს საგადახდო სისტემების განვითარების სამომავლო მიმართულებებზე, მათ შორის მყისიერი გადახდების სისტემის (IPS) დანერგვაზე, 24/7 რეჟიმში ოპერირების უზრუნველყოფასა და ახალი სტანდარტების გამოყენებაზე.

"საქართველოს ეროვნული ბანკის წარმომადგენლებმა სტუმრებს გაუზიარეს პროექტის განხორციელების პროცესში მიღებული გამოცდილება, ძირითადი გამოწვევები და მათ გადასაჭრელად გამოყენებული მიდგომები. ასევე წარადგინეს მნიშვნელოვანი მაგალითები და რეკომენდაციები, რომლებიც შეიძლება სასარგებლო იყოს მსგავსი მასშტაბის ინფრასტრუქტურული პროექტების დაგეგმვისა და განხორციელებისას,"- წერს ეროვნული ბანკი.