საქართველოში ძალაუფლების მქონე პირთა მიზანი მოსახლეობაში EU-ის იდეისადმი მხარდაჭერის შემცირებაა - პეტერ ფიშერი
BM.GE|bm.ge
საქართველოში გერმანიის ელჩი პეტერ ფიშერი ფიქრობს, „ისინი, ვინც საქართველოში ძალაუფლებაში არიან, მივიდნენ დასკვნამდე, რომ არ სურთ ევროკავშირში გაწევრიანება, რომ ეს არ არის მათ ინტერესში. თუმცა, მათ არ შეუძლიათ ეს უთხრან მოსახლეობას“ - ამის შესახებ დიპლომატმა, ქვეყანაში თავისი მისიის დასასრულს „რადიო თავისუფლებასთან“ ინტერვიუში განაცხადა.
ის ამბობს, რომ მათი მიზანი საქართველოს მოსახლეობაში ევროკავშირის იდეისადმი მხარდაჭერის შემცირებაა.
„ეს არის ჩემი ერთგვარი დასკვნა საქართველოზე, აქ ოთხწლიანი მუშაობის შემდეგ: ვფიქრობ, ისინი, ვინც საქართველოში ძალაუფლებაში არიან, მივიდნენ დასკვნამდე, რომ არ სურთ ევროკავშირში გაწევრიანება, რომ ეს არ არის მათ ინტერესში. თუმცა, მათ არ შეუძლიათ ეს უთხრან მოსახლეობას. ისინი არ არიან გულწრფელები და პატიოსნები თავიანთ მოსახლეობასთან, ვინაიდან მოსახლეობა კვლავაც ოცნებობს ევროპაზე, ძალიან მნიშვნელოვანი მიზეზების გამო.
ზოგიერთმა ქართველმა ზუსტად იცის რა არის ევროკავშირი და რას ნიშნავს მასში გაწევრიანება, რა უფლებებსა და პრივილეგიებს, აგრეთვე ვალდებულებებს, რომლებიც ამას მოჰყვება. სხვები უბრალოდ ამბობენ - „მე ვარ ქართველი, მაშასადამე ვარ ევროპელი“, მსურს ევროპული მომავალი ჩემი შვილებისა და შვილიშვილებისთვის და ამასთან, არ გამაჩნია უკეთესი ალტერნატივა, არ მსურს ვიყო რუსი ან თურქი, ირანელი ან აზერბაიჯანელი. მხოლოდ სომხეთთან ერთად ყოფნა, შესაძლოა, არასაკმარისი იყოს.
ვფიქრობ, მიზანი არის საქართველოს მოსახლეობაში ევროკავშირის იდეისადმი მხარდაჭერის შემცირება და თუკი, შესაძლოა, საქართველოს ევროკავშირში გაწევრიანების პროექტი ჩავარდება, ეს დაბრალდეს ევროკავშირს - თქვან, რომ ეს ჩვენი კი არა, იმათი ბრალი იყოო“, - განაცხადა პეტერ ფიშერმა.
კითხვაზე თუ არა ევროკავშირი - საით მიემართება ახლა საქართველო, გერმანელი დიპლომატი პასუხობს, რომ ევროკავშირი საქართველოს პარტნიორია და საქართველოს ამ გზაზე დაბრუნება ყოველთვის შეუძლია. რაც შეეხება საქართველოს ახლანდელ მიმართულებას, ფიშერი თვლის, რომ ქვეყანას ყოველთვის ჰქონდა სამი გზა საით წასულიყო და ქართველი ხალხის გადასაწყვეტია რა კურსს აირჩევენ ისინი.
„უპირველესად ვიტყვი, რომ კანდიდატის სტატუსი ადგილზეა. თუ საქართველო დაუბრუნდება ევროკავშირის გზას, მას კვლავაც შეუძლია გაწევრიანება.
ჩვენ იმედიანი კავშირი ვართ. ყოველთვის საუკეთესოს იმედი გვაქვს. ხანდახან ხალხი ზურგს გვაქცევს, ჩვენ კი ვიმედოვნებთ, რომ, თუკი ისინი მოისურვებენ ჩვენკენ მობრუნებას, ძალიან მოხარულები ვიქნებით შევეგებოთ მათ.
უპირველესად უნდა ითქვას, რომ ჩვენ არ ვართ საქართველოს მტრები, არამედ ჩვენ ვართ მეგობრები და პარტნიორები.
ყოველთვის მიმაჩნდა, რომ საქართველოსთვის სამი ძირითადი გზა არსებობს: ერთი არის ევროკავშირში გაწევრიანება - მოდით, ვუწოდოთ ამას ევროპული მომავალი. ამას ვუწოდებ ხოლმე "ოქროს მომავალს", იმ ქვეყნებზე დაკვირვებით, რომლებიც წარსულში გაწევრიანდნენ.
თუ საქართველო არ გაწევრიანდება ევროკავშირში, ვფიქრობ, ის იქნება ერთი პატარა ქვეყანა სამხრეთ კავკასიაში, რაიმე განსაკუთრებული ალიანსისა და რომელიმე ბაზარზე ინტეგრაციის გარეშე. თქვენ გაქვთ 3.7 მილიონიანი ბაზარი. ეს ძალიან პატარა ბაზარია.
ცხადია, მთლიანად საქართველოს ხალხის გადასაწყვეტია - რა კურსს დაადგება ქვეყანა. ზოგიერთი ქართველი მეუბნება, შეგვიძლია ვიყოთ მეორე დუბაი ან მეორე შვეიცარიაო, - კეთილი, რატომაც არა? ეს არც ისე ადვილია, მაგრამ, იღბალს გისურვებთ ამის მიღწევაში.
მესამე ვარიანტი არის სამხრეთ კავკასიის პატარა ქვეყნად ყოფნა, საგანგებო ალიანსისა და საბაზრო ინტეგრაციის გარეშე. პლუს, ეს იქნება ქვეყანა დემოკრატიისა და ადამიანის უფლებების იმაზე დაბალი სტანდარტით, ვიდრე ეს ევროკავშირში ან გერმანიაშია. ასეთ შემთხვევაში, ესეც საქართველოს ხალხის გადასაწყვეტია. ჩვენ გვექნება ურთიერთობები, მაგრამ ეს იქნება აბსოლუტურად განსხვავებული ურთიერთობები, ვიდრე გვექნებოდა თქვენი ევროკავშირში გაწევრიანების შემთხვევაში, როცა ეს იქნებოდა სუპერ-განსაკუთრებული - ჩვენ გავიზიარებდით ევროკავშირის მოქალაქეობას. ჩვენ გვაქვს სამუშაო ძალის, კაპიტალის, სერვისებისა და საქონლის გადაადგილების თავისუფლება, ჩვენ ინტეგრირებულები ვართ“, - აცხადებს პეტერ ფიშერი.
რაც შეეხება „რადიო თავისუფლების“ ჟურნალისტის კითხვას - სახიფათოა თუ არა „ქართული ოცნების“ ახალი ნარატივი, რომ დღევანდელი ევროკავშირში საქართველოს არაფერი ესაქმება, მაშინ როდესაც საქართველო პატარა ქვეყანაა, პეტერ ფიშერი ამ შეკითხვას დიპლომატიურად პასუხობს:
„ჩვენ ვამბობთ ხოლმე, რომ ევროკავშირის ყველა წევრი ქვეყანა პატარაა. ერთხელ, ლონდონში რომ ვმუშაობდი, ლორდთა პალატაში მოსმენა იყო, რომელსაც საფრანგეთისა და გერმანიის ელჩები ესწრებოდნენ. მოსმენა ევროკავშირს ეხებოდა. ლორდმა, რომელიც მოსმენას თავმჯდომარეობდა, იკითხა იყვნენ თუ არა იქ ევროპის პატარა ქვეყნების წარმომადგენლები და საფრანგეთისა და გერმანიის ელჩები ერთდროულად წამოდგნენ.
ევროკავშირის ერთ-ერთი უპირატესობა ის არის, რომ დიდი ძალების სამყაროში, სადაც არის ტენდენცია, რომ დიდი სახელმწიფოები გადაწყვეტილებებს იღებენ ძალაუფლებითა და ძალის გამოყენებით და შესაძლოა, მსოფლიოს გავლენის სფეროებად ყოფენ, პატარა მეზობლებს ისე ეპყრობიან, როგორც მოესურვებათ, ევროკავშირი სარგებლობს სუვერენიტეტით. როგორც კავშირმა, შეგვიძლია დავიცვათ ჩვენი ინტერესები უკეთესად, ვიდრე ამას ინდივიდუალურად შევძლებდით.
მღელვარე ზღვებისა და სუპერ-ტანკერების სამყაროში, პატარა გემებს რთული დრო უდგათ და საქართველო ძალიან პატარა გემია. ვფიქრობ, ევროკავშირში კი ყველანი პატარა გემები ვართ, მაგრამ ევროკავშირში გერმანიასა თუ საფრანგეთზე უფრო პატარა ქვეყნებიც იზიარებენ მოსაზრებას, რომ ჩვენი ინტერესების დაცვისას გაცილებით კომფორტულად ვგრძნობთ თავს როგორც გუნდი, ვიდრე ამას ცალ-ცალკე მოვახერხებდით“.
გერმანიის ელჩი საქართველოში მცდარს უწოდებს, „ქართული ოცნების“ მხრიდან ბოლო პერიოდში გავრცელებულ ნარატივებს ევროპაში არსებულ ვარდნასა და უკონტროლო მდგომარეობაზე და აცხადებს:
„ნარატივი არის, რომ ევროპა უფსკრულისკენ მიექანება, ევროპა ვარდნაშია, ჩვენ ცუდი ეკონომიკა გვაქვს, განვიცდით მიგრაციის ზეწოლას და დავკარგეთ კონტროლი. ნარატივის ნაწილად მოყვანილია დანიის მაგალითი, პოლიციის მოქმედება დანიაში. ფაქტობრივად, ეს მთლიანად მცდარია.ევროპა კვლავაც წარმატებული ადგილია. ევროპაში კარგი ცხოვრებაა. ევროპაში გვაქვს კანონის უზენაესობა. ევროპაში გვაქვს დემოკრატია. ევროპა არ არის სრულყოფილი. არც ერთი ადგილია სრულყოფილი. პოლიტიკური ცხოვრება ყოველთვის მიმდინარე პროცესია. ნეტავ, ვის სჯერა საქართველოში ევროპაზე ამ ნარატივის? - ვფიქრობ, ყველა ქართველს მოსწონს ევროპა, მოსწონთ ევროპაში მოგზაურობა, ევროპაში ყოფნა. მათ სურთ იყვნენ ევროპის ნაწილი. ნება მომეცით, დავასრულო აზრი. ვხედავ, შემდეგი შეკითხვის დასმას აპირებთ
ნარატივი მცდარია. დანია, ბოლოს და ბოლოს, როგორც ზოგიერთ ქართველ პოლიტიკოსს უყვარს ხოლმე რეიტინგების მოშველიება, საყოველთაოდ აღიარებულია სახელმწიფოდ, სადაც ძალიან კარგი გარემოა ადამიანის განვითარების, კეთილდღეობის, დემოკრატიისთვის, გამჭვირვალებისა და კანონის უზენაესობის კუთხით. პოლიციის ეს ქმედება სრულიად გაბუქებულია. მე დანიელი არ ვარ. არ ვლაპარაკობ დანიურად. თუმცა, სრულიად დარწმუნებული ვარ, რომ იქ მომხდარს გამჭვირვალედ და სრულფასოვნად იძიებენ. რამდენადაც ვიცი, ამ ეტაპზე არ არსებობს ინფორმაცია ვინმეს დაზიანებაზე.
ამდენად, ეს მაგალითი არის სრული აბსურდი. ანუ, ეს არის გამოგონილი ნარატივი - განსაკუთრებით მთელს ამ „დიპ სტეიტსა“
და შეთქმულებაზე - რომ საქართველო გარემოცულია მტრებითა და აგენტებით, რომლებსაც სურთ როგორმე რაღაც დაუშავონ საქართველოს. ეს, უბრალოდ, არ არის სიმართლე. ევროკავშირი არის საქართველოს პარტნიორი და მეგობარი და გვსურს ეს გაგრძელდეს. ისიც კი გვინდა, რომ ევროკავშირში გაწევრიანდეთ. თუკი ეს მეგობრობა არ არის, მაშინ არ ვიცი მეგობრობა რაღაა“, - აცხადებს გერმანიის ელჩი პეტერ ფიშერი.
