სომხეთმა და აშშ-მა "ტრამპის მარშრუტის" ჩარჩო შეთანხმებას მოაწერეს ხელი

სომხეთმა და აშშ-მა "ტრამპის მარშრუტის" [ტრამპის მარშრუტი საერთაშორისო მშვიდობისა და კეთილდღეობისთვის“ TRIPP] ჩარჩო შეთანხმებას მოაწერეს ხელი.

როგორც სომხური სააგენტო Armenpress წერს, დოკუმენტზე შეთანხმება ჯერ კიდევ გასულ კვირაში სახელმწიფო მდივნის მარკო რუბიოს ვიზიტისას შედგა.

სომხეთის საგარეო საქმეთა სამინისტრომ გამოაქვეყნა ვიდეო, თუ როგორ აწერს ხელს შეთანხმებას საგარეო საქმეთა მინისტრი არარატ მირზოიანი.

„ძვირფასო მოქალაქეებო, რამდენიმე წუთის წინ ხელი მოვაწერე სომხეთ-აშშ-ის ჩარჩო შეთანხმებას TRIPP-ის შესახებ. როგორც გახსოვთ, რამდენიმე დღის წინ, სომხეთში ვიზიტისას, მას ხელი მოვაწერეთ მე და აშშ-ის სახელმწიფო მდივანმა მარკო რუბიომ. ამით ხელმოწერის პროცესი დასრულებულია და შეთანხმება მზად არის რატიფიცირებისთვის“, - განაცხადა მირზოიანმა.

ცნობისთვის, გასულ კვირაში რუბიო ერევანში იმყოფებოდა ოფიციალური ვიზიტით. ინდოეთიდან მომავალმა აშშ-ის სახელმწიფო მდივანმა მართალია ხანმოკლე ვიზიტი გამართა სომხეთში და მხოლოდ საგარეო საქმეთა მინისტრს შეხვდა, თუმცა მხარეებმა სამი შეთანხმება გააფორმეს. მათ შორის, „ტრამპის მარშრუტსა“ და მინერალებზე. ასევე შეთანხმება გაფორმდა სტრატეგიულ პარტნიორობაზე, რითაც ტრამპის ადმინისტრაციამ უფრო მაღალ დონეზე აიყვანა ჯო ბაიდენის დროს დადებული სტრატეგიული პარტნიორობის ხელშეკრულება.

ვრცლად ამ თემაზე: აშშ-ის სახელმწიფო მდივნის ვიზიტი ერევანში - ახალი სტრატეგიული შეთანხმებები და ტრამპის მხარდაჭერა ფაშინიანს