სუვერენული პოლიტიკის გამო საქართველო დასავლელი ლიდერებისა და ევროპული ბიუროკრატიის სამიზნე გახდა - კობახიძე
საქართველოს ხელისუფლების მიერ სუვერენული პოლიტიკის გატარებისა და სახელმწიფოებრივი ინტერესებით მოქმედების გამო, ქვეყანა ევროპული ბიუროკრატიისა და დასავლელი ლიდერების სამიზნე გახდა, - ამის შესახებ ირაკლი კობახიძემ მთავრობის ადმინისტრაციაში გამართულ ბრიფინგზე განაცხადა.
მისი თქმით, საქართველოს ხელისუფლების მიერ ე.წ. „დიფ სთეითის“ აგენტურის მოთხოვნებზე უარის თქმის შემდეგ სხვადასხვა ქვეყანამ, მათ შორის აშშ-ის წინა ადმინისტრაციამ, ხელისუფლებაზე ზეწოლის სხვადასხვა მექანიზმი გამოიყენა.
„სანქციები დაუწესეს საქართველოს ხელისუფლების უმაღლეს პირებს, მმართველი პარტიის საპატიო თავმჯდომარეს, ბატონ ბიძინა ივანიშვილს, ქართველ მოსამართლეებს, პოლიციის მაღალჩინოსნებს, ფიზიკურ პირებს და ა.შ.“ - განაცხადა კობახიძემ.
პრემიერის განცხადებით, ხელისუფლებაზე ზეწოლის ერთ-ერთ ინსტრუმენტად საქართველოს ევროკავშირში გაწევრიანების მიზანიც გამოიყენეს.
„ასევე, ხელისუფლებაზე ზეწოლისთვის გამოიყენეს საქართველოს გაცხადებული მიზანი, გახდეს ევროკავშირის სრულუფლებიანი წევრი“, - აღნიშნა მან.
კობახიძის თქმით, მას შემდეგ, რაც სანქციებისა და სხვა ზეწოლის შედეგად ხელისუფლების შეცვლა ან მისთვის სასურველი შედეგის მიღწევა ვერ მოხერხდა, მისი შეფასებით, საქართველოს წინააღმდეგ ახალი პროვოკაციის მოწყობა საკუთარი აგენტურის გამოყენებით იგეგმება.
„მას შემდეგ, რაც მათთვის სასურველი შედეგი არც ამის შედეგად დადგა, რადგან საქართველოს მოსახლეობის მხარდაჭერით ზურგგამაგრებული მმართველი პარტია ვერ დაიმორჩილეს, საკუთარი აგენტურის გამოყენებით საქართველოს ახალ პროვოკაციაში გახვევას ცდილობენ“, - განაცხადა კობახიძემ.
ცნობისთვის, კობახიძემ დღეს 12 აგვისტოს ბრიფინგი "რუსოფობიის" თემაზე ჩანიშნა.
BM.GE
წყარო: bm.ge