ტრამპი სრულწლოვან ამერიკელებს $5000-ს ჰპირდება, თუ რესპუბლიკელები არჩევნებს მოიგებენ

აშშ-ის პრეზიდენტმა დონალდ ტრამპმა განაცხადა, რომ ნოემბრის შუალედურ არჩევნებში რესპუბლიკური პარტიის მიერ კონგრესზე კონტროლის შენარჩუნების შემთხვევაში, თითოეულ სრულწლოვან ამერიკელს 5 000 დოლარის ოდენობის „ტრამპის დივიდენდს“ გადაუხდის.

„რესპუბლიკელები თუ შეინარჩუნებენ უმრავლესობას აშშ-ის წარმომადგენელთა პალატასა და სენატში, ჩვენი წარმოუდგენელი ეკონომიკური წარმატების წყალობით, მე ამერიკის შეერთებული შტატების თითოეულ სრულწლოვან მოქალაქეს 5 ათასი დოლარის ოდენობის დივიდენდს გადავუხდი“, – განაცხადა აშშ-ის პრეზიდენტმა.

ინიციატივა ტრამპმა რესპუბლიკური პარტიის ისტორიაში პირველ შუალედურ ყრილობაზე გააჟღერა. დასავლური მედია წერს, რომ ჯერჯერობით გაურკვეველია, როგორ განხორციელდება აღნიშნული ან რამდენად შეესაბამება ის კანონმდებლობას. აშშ-ში დაახლოებით 270 მილიონი სრულწლოვანი ცხოვრობს, რაც იმას ნიშნავს, რომ ინიციატივის საერთო ღირებულება დაახლოებით 1.35 ტრილიონ დოლარს შეადგენს.

ტრამპმა განაცხადა, რომ მან „საპრეზიდენტო ისტორიაში საუკეთესო ორი წელი“ დაასრულა. პრეზიდენტმა საკუთარი თავი არჩევნების ცენტრალურ ფიგურად დაასახელა.

„თუ ამერიკის მომავალს რადიკალ მემარცხენე დემოკრატებს ჩავაბარებთ, ჩვენს ერს მთელი ათწლეული დასჭირდება ფეხზე წამოსადგომად. მიეცით ხმა რესპუბლიკელებს და ჩვენ მსოფლიოს თაობების განმავლობაში ჩამოვიტოვებთ უკან“, - განაცხადა დონალდ ტრამპმა