უკრაინამ Patriot-ის 1 000 რაკეტის შესაძენად კონტრაქტები გააფორმა

უკრაინამ პარტნიორების დახმარებითა და ევროკავშირის სესხით Patriot-ის საჰაერო თავდაცვის სისტემებისთვის დაახლოებით 1 000 რაკეტის შესყიდვის კონტრაქტები გააფორმა.

როგორც ირკვევა, ამ სიახლის შესახებ უკრაინის თავდაცვის მინისტრმა, ევგენი ხმარამ რამშტაინის საკონტაქტო ჯგუფის შეხვედრაზე ისაუბრა. უწყების ხელმძღვანელმა დააზუსტა, რომ შეკვეთილი შეიარაღების ძირითადი ნაწილის მიწოდება მომდევნო წლებში დაიწყება. რაც შეეხება უახლოეს პერიოდს, მოსალოდნელი დაყოვნების გამო, კიევი მოელის, რომ მოკავშირეები საკუთარი მარაგებიდან რაკეტებს დაუყოვნებლივ გამოყოფენ. ამ მხრივ ხელისუფლებამ მხარდამჭერ სახელმწიფოებს ინფორმაცია უკვე მიაწოდა.

მნიშვნელოვანია ითქვას, რომ უკრაინული მხარე პარტნიორებს შეიარაღების უსასყიდლოდ გადაცემას არ სთხოვს და ე.წ. გაცვლის სქემას სთავაზობს. ოფიციალური კიევი მოკავშირეებს მიღებული სამხედრო მასალების სანაცვლოდ სამომავლოდ ახალ გაუმჯობესებულ რაკეტებს დაუბრუნებს.

როგორც ირკვევა, ამ ეტაპზე ქვეყანას დაუყოვნებლივ 300 Patriot-ის რაკეტა, 500 ე.წ. „ჰაერი-ჰაერის“ ტიპის ჭურვი და გადასატანი საზენიტო კომპლექსები ესაჭიროება. ამას გარდა, უპილოტო საფრენი აპარატების დასაფინანსებლად დამატებით $2 მილიარდია საჭირო, თავდაცვის ბიუჯეტის საერთო დეფიციტი კი $27 მილიარდს შეადგენს.

ცნობისთვის, 8 სექტემბერს ევროკავშირის წევრმა ქვეყნებმა სპეციალური გამონაკლისი დაამტკიცეს. ამ გადაწყვეტილებით უკრაინამ €90 მილიარდის ($104.4 მლრდ.) მოცულობის სესხის ფარგლებში Patriot-ის რაკეტების შეძენის უფლება მიიღო.