ვიკვლევთ, არსებობს თუ არა ნეთანიაჰუს დაკავების სამართლებრივი მექანიზმი - ნიუ-იორკის მერი

ნიუ-იორკის მერი ზოჰრან მამდანი ისრაელის პრემიერ-მინისტრ ბენიამინ ნეთანიაჰუს შესაძლო დაკავების საკითხზე სამართლებრივ შესაძლებლობებს განიხილავს. მისი განცხადებით, ადმინისტრაცია იკვლევს, აქვს თუ არა ქალაქის ხელისუფლებას რაიმე სამართლებრივი მექანიზმი, რომელიც ნეთანიაჰუს დაკავების საშუალებას მისცემს, თუ ის ნიუ-იორკში გაეროს გენერალური ასამბლეის სხდომაზე დასასწრებად ჩავა.

მამდანიმ ამის შესახებ The New York Times-თან ინტერვიუში ისაუბრა და აღნიშნა, რომ საკითხზე ქალაქის იურისტებთან კონსულტაციები მიმდინარეობს. მისი თქმით, ნებისმიერი გადაწყვეტილება მოქმედი კანონმდებლობის ფარგლებში უნდა იყოს მიღებული და მისი ადმინისტრაცია ამ შემთხვევისთვის ახალი წესების შექმნას არ აპირებს.

ნიუ-იორკის მერმა ყურადღება გაამახვილა საერთაშორისო სისხლის სამართლის სასამართლოს (ICC) მიერ ნეთანიაჰუს მიმართ გაცემულ დაკავების ორდერზე და განაცხადა, რომ ისრაელის პრემიერ-მინისტრი სასამართლოს წინაშე უნდა წარდგეს. თავად ნეთანიაჰუ და ისრაელის ხელისუფლება აღნიშნულ ბრალდებებს უარყოფენ.

მამდანის განცხადებებს კრიტიკა მოჰყვა როგორც ისრაელის, ისე აშშ-ის ზოგიერთი წარმომადგენლის მხრიდან. ოპონენტები აცხადებენ, რომ ქალაქის მერს უცხო ქვეყნის მოქმედი ლიდერის დაკავების უფლებამოსილება არ აქვს და მსგავსი საკითხები ფედერალური ხელისუფლების კომპეტენციას განეკუთვნება.

ნეთანიაჰუს ნიუ-იორკში ვიზიტი გაეროს გენერალური ასამბლეის ფარგლებში იგეგმება. ზოჰრან მამდანი, რომელიც ისრაელის მთავრობის პოლიტიკის მიმართ კრიტიკული პოზიციით გამოირჩევა, აცხადებს, რომ მისი ადმინისტრაცია ყველა შესაძლო სამართლებრივ გზას შეისწავლის.